ԵՐԵՎԱՆ, 31 հունվարի – Sputnik. Կուրսկի մարզի Ռուսսկոյե Պորեչնոյե գյուղում խաղաղ բնակիչների սպանության հետ կապ ունեցող բոլոր անձինք կնույնականացվեն և պատասխանատվության կենթարկվեն: Այսօրվա ճեպազրույցի ժամանակ այս հայտարարությունն արեց ՌԴ ԱԳՆ պաշտոնական ներկայացուցիչ Մարիա Զախարովան։
«Մենք վստահ ենք, որ բոլոր մեղսակիցները կնույնականացվեն և կենթարկվեն օրենքով նախատեսված պատասխանատվության», - ասաց նա։
Զախարովայի խոսքով` հետաքննության ընթացքում կպարզվեն ուկրաինական զինված կազմավորումների հրամանատարները, որոնք տվել են հանցավոր հրամաններ, ինչպես նաև այդ հանցագործությունների այլ մասնակիցները, որոնց գործողություններին կտրվի քրեաիրավական գնահատական:
Ավելի վաղ ՌԴ ՔԿ պաշտոնական ներկայացուցիչ Սվետլանա Պետրենկոն հայտնել էր, որ զինվորական քննիչները պարզել են Ուկրաինայի ԶՈւ 5 զինվորականների ինքնությունը, որոնք առնչություն ունեն Կուրսկի մարզի Ռուսսկոյե Պորեչնոյե գյուղի բնակիչների սպանությունների և բռնաբարությունների հետ:
Քննության տվյալներով՝ ավագ զինվոր Եվգենի Ֆաբրիսենկոն, ինչպես նաև «Կում», «Մոտիլ», «Պրովոդնիկ», «Խուդոժնիկ» ազդականչերով ուկրաինացի զինվորականները 2024 թվականի սեպտեմբերին ներխուժել են Կուրսկի մարզի տարածք։ Սուջայի շրջանում մարտերի ժամանակ Ֆաբրիսենկոն գերեվարվել է։ Հարցաքննության ժամանակ նա պատմել է այն հանցագործությունների մասին (բռնաբարություններ, սեռական բնույթի բռնի գործողություններ և սպանություններ), որոնք կատարել է Ուկրաինայի զինված կազմավորումների այլ զինվորականների հետ:
Հետաքննությունը պարզել է, որ 2024 թվականի սեպտեմբերի 28-ից նոյեմբերի 24-ը Ֆաբրիսենկոն, «Մոտիլը», «Պրովոդնիկը» և «Խուդոժնիկը» «Կում» ազդականչով հրամանատարի հրահանգով Ռուսսկոյե Պորեչնոյե գյուղում սպանել են 11 տղամարդու և 3 կնոջ։ Բացի այդ, նրանք բռնաբարել են 8 կանանց և սպանել։ Այնուհետև հանցակիցները 22 քաղաքացիների մարմինները տեղափոխել են առանձնատների նկուղներ։