ԵՐԵՎԱՆ, 4 հունվարի - Sputnik. ՀՀ վարչապետ Նիկոլ Փաշինյանն անդրադարձել է իր և տիկնոջ` Աննա Հակոբյանի և դստեր` Վատիկան կատարած այցի ընթացքում հյուրանոցի կեցության գումարին` հրապարակելով դրա չափը։
Նշենք, որ ավելի վաղ Panorama.am-ը գրել էր, որ Աննա Հակոբյանի Իտալիա կատարած այցի ընթացքում ծախսված գումարների չափը խիստ գաղտնի է պահվում ԶԼՄ-ներից, մինչդեռ ակնհայտ է, որ պետական բյուջեից մի քանի միլիոն գումար է ծախսվել։ Ըստ հրապարակված տեսանյութերի, Աննա Հակոբյանին ուղեկցել է անվտանգության առնվազն երեք աշխատակից, նրա հետ են եղել նաև անձնական վարսավիրն ու դուստրը:
«Իմացա, որ աղմուկ է բարձրացել, թե Վատիկան կատարած այցի ժամանակ անհավանական ծախսեր են արվել մեր կեցության վրա։ Տեղադրում եմ Հռոմի` մեզ համար վարձված սենյակի տեսանյութը: Ես նույն օրը վերադարձել եմ, Աննան մնացել է այս սենյակում, որովհետեւ միջպետական հրավերով պիտի այլ միջոցառման մասնակցեր։ Պետբյուջեից ծախսվել է 787 հազար դրամ»,–գրել է Փաշինյանը։
Նոյեմբերի 26-ին կայքը գրավոր հարցում էր ուղղել կառավարությանը` հետաքրքրելով, թե որքա՞ն գումար է ծախսվել վարչապետի տիկնոջ Իտալիա կատարած այցի համար։ Լրատվամիջոցը խնդրել էր տրամադրել ծախսերի բացվածքը՝ այդ թվում վերադարձի ժամանակ ինքնաթիռի տոմսերի համար վճարված գումարը, հյուրանոցում կեցության գումարը, թանգարանների տոմսերի գումարը և այլն։ Սակայն հարցմանն այդպես էլ կառավարությունից չէին պատասխանել, ուղղորդելով դիմել «Իմ քայլը» հիմնադրամին։
Նաև «Իմ քայլը» հիմնադրամն էր անպատասխան թողել հարցումը` կոպտելով լրագրողին։ Panorama.am-ը «Իմ քայլը» հիմնադրամից դեկտեմբերի 19-ին էթիկական չափանիշների և կոռեկտության տեսանկյունից բավականին վիճելի պատասխան էին տվել` լրագրողին առաջարկելով մասնակցել «Կրթվելը նորաձև է» նախաձեռնության շրջանակներում մեկնարկած «Հաղորդակցության հմտություններ» դասընթացների շարքին։ Ընդգծվել էր, որ դասընթացի մասնակցությունը թույլ կտա ձեռք բերել նոր գիտելիքներ և տարանջատել, թե որ կառույցին և ում ինչ հարց կարելի է ուղղել և հարցումը ձևակերպելիս որ դեպքերում կարելի է հղում կատարել «Տեղեկատվության ազատության մասին» ՀՀ օրենքին:
Աննա Հակոբյանի գլխավորած հիմնադրամից չեն պատասխանել նաև հարցին, թե Իտալիայում անցկացված ռուս-ուկրաինական դիմակայության 1000 օրվա միջոցառումներին նրա մասնակցության համար որքան է ծախսվել։