ԵՐԵՎԱՆ, 28 դեկտեմբերի - Sputnik. ԱՄՆ-ի և Մեծ Բրիտանիայի հետախուզությունները ԻՊ-ի («Իսլամական պետություն», ՌԴ-ում արգելված ահաբեկչական կազմակերպություն) հրամանատարներին առաջադրանք են տվել հարձակումներ իրականացնել Սիրիայում ՌԴ ռազմակայանների վրա, հայտնել է Ռուսաստանի արտաքին հետախուզության ծառայության մամուլի բյուրոն:
ԱՀԾ-ի տվյալներով` ԱՄՆ հեռացող վարչակազմն ու Մեծ Բրիտանիայի ղեկավարությունը ցանկանում են խոչընդոտել Սիրիայում իրավիճակի կայունացմանը, այնտեղ քաոս սարքել, սակայն դրան խանգարում է Սիրիայում Ռուսաստանի ռազմական ներկայությունը:
«Այդ «խանգարող հանգամանքը» վերացնելու համար բրիտանական հատուկ ծառայությունները Սիրիայում ռուսական ռազմական օբյեկտների վրա ահաբեկչական հարձակումների շարք կազմակերպելու ծրագրեր են մշակում։ Կատարողների դերը վերապահվում է «Իսլամական պետություն» ահաբեկչական խմբավորման գրոհայիններին, որոնց վերջին շրջանում «նոր իշխանությունները» ազատ են արձակել բանտերից: Բացի այդ, նրանք, ըստ էության, անվերահսկելի հասանելիություն են ստացել նախկին սիրիական բանակի մնացած զինանոցներին»,-ասվում է հայտարարության մեջ։
Գերատեսչությունը հայտնել է, որ ահաբեկիչները ՌԴ-ի ռազմակայանների վրա հարձակվելու համար հարվածային ԱԹՍ-ներ են ստացել։
«Առկա տվյալներով` անգլիական Մի-6 հետախուզության և ամերիկյան ԿՀՎ-ի ներկայացուցիչները վերջերս Սիրիայում տեղակայված ԻՊ-ի վերահսկողության տակ գտնվող դաշտային հրամանատարներին առաջադրանք են տվել մի շարք հարձակումներ իրականացնել ՌԴ ռազմաբազաների վրա։ Այդ կեղտոտ աշխատանքը կատարելու համար ահաբեկիչները հարվածային ԱԹՍ-ներ են ստացել»,-նշում է ԱՀԾ-ն։
Հաղորդագրության մեջ նշվում է նաև, որ ԱՄՆ-ի և Մեծ Բրիտանիայի ռազմական հրամանատարությունն իր ռազմաօդային ուժերին հրահանգել է շարունակել հարվածներ հասցնել ԻՊ-ի դիրքերին, ինչի մասին գրոհայիններին նախապես տեղեկացնում են։