Ավինյանի հոր խոսքերի շուրջ ստեղծված սկանդալն օրինաչափ է, իսկ ինչո՞ւ են լռում ՀԿ–ները

ԵՐԵՎԱՆ,27 դեկտեմբերի – Sputnik. Երևանի քաղաքապետ Տիգրան Ավինյանի հոր սկանդալային հայտարարությունը հասարակության նկատմամբ իշխանավորների վերաբերմունքի դրսևորում է, և այս ամենը տեղի է ունենում հասարակական կազմակերպությունների լռության ֆոնին: Այս մասին Sputnik Արմենիայի հետ զրույցում ասաց քաղաքական մեկնաբան Հակոբ Բադալյանը։

Նշենք, որ երեկ Ավինյանի հայրը` Արմեն Ավինյանը, կարմիր գծերի սակագների մասին Oragir.News–ի լրագրողի հարցին ի պատասխան նշել էր, որ 160 000 դրամն էլ է քիչ, կենտրոնում կայանման վճարը պետք է 500 000 դրամ լինի։ «Պիտի 500․000 սարքեն, որ ամեն համբալ չգա, կանգնի ստեղ իրա գեղի «Opel»-ով․․․ Գնացեք Իտալիա` տեսեք. ավտոյի գին պետք է մուծեն, որ քաղաքի կենտրոն մտնեն»։

Բադալյանի խոսքով ՝ քաղքենի վերաբերմունքը, մարդկանց սոցիալական դասակարգերի բաժանելը, ուրիշներին վերևից նայելը լայնորեն տարածված հասարակական արատ է, որը հատկապես դրսևորվում է կառավարող վերնախավի մոտ, ինչը էլ ավելի դատապարտելի ու մերժելի է։

Նա կարծում է, որ մարդկանց դասակարգելու արատավոր մտածողության դեմ պետք է պայքարել դպրոցից սկսած, քանի որ այդ երևույթը նկատելի է ամենուր ու ամեն քայլափոխի։ Իսկ իշխող վերնախավն իր շրջապատով պետք է լինի այդ պայքարի առաջնագծում ՝ նման վարքագիծ ցույց տալու փոխարեն։

Ավելի ուշ` Երևանի քաղաքապետ Տիգրան Ավինյանն ներողություն է խնդրել հոր կոպիտ պահվածքի համար։ Քաղաքական մեկնաբանի կարծիքով` Ավինյանի խոսքն ավելի շատ ոչ թե ներողություն խնդրելու համար էր, այլ արդարացնելու փորձ էր։

«Ժողովրդավարական առաջադեմ պետություններում նմանօրինակ իրավիճակում անխուսափելի կլիներ պաշտոնյայի հրաժարականի պահանջը։ Եվ մեր հասարակությունը պետք է նման երևույթների համար այդպիսի բարձր նշաձող սահմանի։ Ի վերջո դրանից է կախված, թե բարձրաստիճան պաշտոնյաները ինչ հետևություններ կանեն նման իրավիճակներում»,-նշեց Բադալյանը։

Նա մատնանշեց նաև հասարակական կազմակերպությունների կողմից սկանդալային պատմությանը քիչ թե շատ լուրջ արձագանքի բացակայությունը:

Նշենք, որ հայաստանյան ՀԿ–ները արևմտյան դրամաշնորհներ են ստանում և ակտիվորեն համագործակցում են իշխող քաղաքական թիմի հետ: Ի դեպ, գործող իշխանության որոշ ներկայացուցիչներ ժամանակին տարբեր ՀԿ-ներ են ղեկավարել։ Իսկ վերջին շրջանում ՀՀ վարչապետի կինը` Աննա Հակոբյանը, պարբերաբար հանդիպումներ է ունենում «հասարակական կարծիք ձևավորող» մարդկանց հետ, որոնց թվում են նաև այդ ՀԿ-ների ներկայացուցիչները։