ԵՐԵՎԱՆ, 24 դեկտեմբերի – Sputnik. ՀՀԿ փոխնախագահ Արմեն Աշոտյանը կարծում է, որ ՀՀ նախկին նախագահները ճիշտ են արել, որ մերժել են վարչապետ Նիկոլ Փաշինյանի բանավեճի հրավերը։ Այս մասին Աշոտյանն ասաց այսօր դատական նիստից հետո լրագրողների հետ զրույցում։
«Նախագահները մերժեցին նրա հրավերն ու ճիշտ արեցին, որովհետև Նիկոլն ուզում է «Օվերտոնի պատուհան» (դիսկուրսի պատուհան) բացել։ Փաշինյանը մի քանի անգամ փորձել է այս հարցում դա անել, բայց չի բացվում այդ պատուհանը։ Նախագահներն էլ, բնականաբար, մերժել են, որ չծառայեն այդ նպատակներին»,- ասաց Աշոտյանը։
Ըստ նրա՝ նախագահները չեն մասնակցում բանավեճին նաև այն պատճառով, որ իրենց մակարդակով չլեգիտիմացնեն այդ հարցի գոյությունը։
«Այստեղ բացարձակ զարմանալու բան չկա՝ պրիմիտիվ շուստրիությանը տուրք տալու թեմա չէ, ես եմ մի քանի անգամ Նիկոլին հրավիրել բանավեճերի։ Ի տարբերություն նախագահների՝ ես, իմ մասնագիտությամբ պայմանավորված, զզվող չեմ, կարող եմ մասնակցել»,- նշեց Աշոտյանը։
Նրա խոսքով՝ Փաշինյանն Արցախին վերաբերող իր հայտարարություններով 2 խնդիր է փորձում լուծել՝ կարճաժամկետ և երկարաժամկետ։ Կարճաժամկետ առումով ուզում է նախընտրական շրջանում մաքրել իրեն մեղքերից, առաջին հերթին Արցախի հանձնման մեղքն է, իսկ երկարաժամկետ առումով՝ պատմության մեջ անունը մաքրել։ ՀՀԿ փոխնախագահը վստահ է՝ բոլոր այդ փորձերն ապարդյուն են։
«Մարդկությունը չի ստեղծել այնպիսի ժավել, որով կարելի է մաքրել Նիկոլի խարանը»,- ասաց Աշոտյանը։
Անդրադառնալով Փաշինյանի վերջին հարցազրույցի ժամանակ հնչեցրած հայտարարություններին՝ Աշոտյանն ասաց՝ ըստ էության, Ալիևի՝ Սոլովյովին տված հարցազրույցի շարունակությունն էր։
«Չեմ բացառում, որ այսօր Ալիևի ծննդյան օրն էլ շնորհավորած լինի»,- նշեց Աշոտյանը։
Լրագրողները նաև հետաքրքրվեցին` արդյոք հնարավոր համարո՞ւմ է 2025թ-ին արտահերթ ընտրությունների անցկացումը, Աշոտյանը պատասխանեց` ցավոք, մեր երկրում ամեն ինչ հնարավոր է ու վատ սցենարներով։
Հիշեցնենք` Նիկոլ Փաշինյանը դեկտեմբերի 23-ին ֆեյսբուքյան իր էջում գրել էր, թե 1994 թվականից ի վեր բանակցային գործընթացը եղել է Լեռնային Ղարաբաղը Ադրբեջանի կազմ վերադարձնելու մասին: ՀՀ երեք նախագահների գրասենյակները հայտարարություններ էին տարածել՝ կեղծ և սուտ անվանելով Փաշինյանի պնդումները։ Դրանից հետո Փաշինյանը հերթական գրառումն արեց՝ բանավեճի հրավիրելով ՀՀ երեք նախագահներին։