ԵՐԵՎԱՆ, 13 դեկտեմբերի - Sputnik. Վաշինգտոնն ու Անկարան «լայն համաձայնության» են հասել Սիրիայի կարգավորման հարցում։ Այս մասին հայտարարել է ԱՄՆ պետքարտուղար Էնթոնի Բլինկենը, գրում է ՌԻԱ Նովոստին։
«Մենք կենտրոնացած ենք մեր և սիրիացի ժողովրդի առջև բացվող հնարավորության վրա։ Մենք նպատակ ունենք Սիրիայի ժողովրդին ազատագրել Բաշար Ասադի կապանքներից․․․ Թուրքիայի նախագահ Թայիփ Էրդողանի, ԱԳ նախարար Հաքան Ֆիդանի հետ մեր քննարկումների ընթացքում մենք լայն իմաստով համաձայնության ենք եկել Սիրիայի ապագայի տեսլականի վերաբերյալ մեր քայլերի շուրջ»,-ասել է պետքարտուղարը։
Ավելի վաղ Թուրքիայի նախագահ Ռեջեփ Թայիփ Էրդողանը Բլինկենի հետ բանակցությունների ժամանակ հայտարարել էր, որ Անկարան հանդես է գալիս Սիրիայի տարածքային ամբողջականության և ունիտար կառուցվածքի պահպանման օգտին:
Հիշեցնենք` դեկտեմբերի 8-ին ընդդիմության ներկայացուցիչները եթերում հայտարարեցին, որ Սիրիան անցել է իրենց վերահսկողության տակ։ Երկրի վարչապետ Մուհամմեդ Ղազի ալ-Ջալալին հայտնեց, որ մի քանի նախարարների հետ մնում է Սիրիայում և արդեն կապ է հաստատել զինված ընդդիմության առաջնորդների հետ:
Ռուսաստանի ԱԳՆ-ից հայտարարեցին, որ Սիրիայի նախագահ Բաշար Ասադը հակամարտության մի շարք մասնակիցների հետ բանակցելուց հետո որոշել է հրաժարվել պաշտոնից և լքել երկիրը՝ հրահանգելով իշխանությունը խաղաղ փոխանցելու գործընթաց սկսել, ընդ որում՝ Ռուսաստանը բանակցություններին չի մասնակցել: Ավելի ուշ հայտնի դարձավ, որ Ասադն ընտանիքի հետ մեկնել է Մոսկվա. ՌԴ-ն ապաստան է տրամադրել նրանց: ՌԻԱ Նովոստին, հղում անելով Կրեմլի իր աղբյուրին հայտնեց, որ ՌԴ պաշտոնյաները կապի մեջ են սիրիական զինված ընդդիմության ներկայացուցիչների հետ, որոնց առաջնորդները երաշխավորել են ՌԴ ռազմաբազաների և դիվանագիտական հաստատությունների անվտանգությունը: