Վայր կդնի՞ մանդատը, եթե Փաշինյանը խնդրի․ ՔՊ խմբակցության ղեկավարի պատասխանը

ԵՐԵՎԱՆ, 4 դեկտեմբերի – Sputnik. ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը պատրաստ է վայր դնել պատգամավորական մանդատը, եթե ՀՀ վարչապետ Նիկոլ Փաշինյանը խնդրի։ Նա այդ մասին ասաց լրագրողների հետ զրույցում։

«Անշուշտ, վայր կդնեի»,- նշեց Կոնջորյանը։

Լրագրողները հետաքրքրվեցին, թե ինչու կհրաժարվի այն մանդատից, որը նրան տվել է ժողովուրդը։ Կոնջորյանն անպատասխան թողեց այդ հարցը։

Հիշեցնենք` ԱԺ պատգամավոր Նարեկ Զեյնալյանը նոյեմբերի 19-ին հրաժարվեց մանդատից։ ՀՀ վարչապետ Նիկոլ Փաշինյանը նոյեմբերի 22-ին Հանրային հեռուստաընկերության եթերում ասաց, որ ինքն է Զեյնալյանին ու Հովիկ Աղազարյանին խնդրել վայր դնել մանդատները: Աղազարյանը հայտարարեց, որ մանդատը վայր չի դնի։ ՔՊ–ն դեկտեմբերի 3-ին նրան հեռացրեց կուսակցությունից, իսկ դեկտեմբերի 4-ին ԱԺ նիստի ժամանակ Աղազարյանը հայտարարեց, որ դուրս է գալիս նաև «Քաղաքացիական պայմանագիր» խմբակցությունից։