ԵՐԵՎԱՆ, 2 դեկտեմբերի – Sputnik. Ազգային ժողովի «Հայաստան» խմբակցության մի խումբ պատգամավորներ դատական հայց են ներկայացրել ընդդեմ ՀՀ կառավարության և արտաքին գործերի նախարարության։ «Ֆեյսբուք» սոցիալական ցանցում այս մասին տեղեկացնում է խմբակցության պատգամավոր Քրիստինե Վարդանյանը։
Պատգամավորը նշել է, որ գործընկերների` Աննա Գրիգորյանի, Գեղամ Մանուկյանի և Արթուր Խաչատրյանի հետ համատեղ ներկայացրած դատական հայցով պահանջում են ոչ իրավաչափ համարել ՀՀ արտգործնախարարի 2024 թ. մարտի 14–ի գրությունը, որով իրենց արգելվել էր ծանոթանալ Ադրբեջանի հետ քննարկվող պայմանագրի փոխանակվող նախագծերին։
Պատգամավորը նաև տեղեկացրել է, որ դատարանը՝ դատավոր Ռոբերտ Մաքեյանի նախագահությամբ, հայցադիմումը վարույթ ընդունելու որոշում է կայացրել։ Նախնական դատական նիստը տեղի կունենա 2025 թ. հունվարի 14–ին։
«Մենք հետևողական ենք լինելու այս կամայական որոշումը չեղարկելու ու հանրության համար հույժ կարևոր փաստաթղթին ծանոթանալու մեր իրավունքը վերականգնելու հարց»,– գրել է Վարդանյանը։
Հիշեցնենք` «Հայաստան» խմբակցության քարտուղար Արծվիկ Մինասյանը հոկտեմբերի 2–ին Ազգային ժողովում կառավարության հետ հարցուպատասխանի ժամանակ հայտարարեց, որ իրենց խմբակցությունը պատրաստվում է դատական հայց ներկայացնել պարզելու համար, թե ինչու է ընդդիմադիր պատգամավորներին արգելված ծանոթանալ խաղաղության պայմանագրի տեքստին։
Մինչ այդ ՀՀ վարչապետ Նիկոլ Փաշինյանն ասել էր, որ Ադրբեջանի հետ խաղաղության պայմանագրի տեքստը հրապարակելը դիվանագիտական տեսանկյունից կոռեկտ չէ, և իշխանությունները տարբեր մակարդակներում այսպես թե այնպես բացահայտել են պայմանագրի էությունն ու բովանդակությունը: