Իրանական մաքսատանը արտասահմանյան համարանիշներով բեռնատարների համար դիզվառելիքի գների կտրուկ բարձրացումն անցած շաբաթ բողոքի ցույցի պատճառ դարձավ։ Հայկական բեռնատարների վարորդները փակեցին դեպի «Ագարակ» անցակետ տանող ճանապարհը։ Խնդիրն այն է, որ հայկական բեռնատարները Իրան են մտնում դատարկ բաքերով, որոնք վերադարձին պետք է լիցքավորված լինեն։ Բայց վերջին օրերին վառելիքի գինը մաքսատան մոտ կտրուկ բարձրացել է։
Sputnik Արմենիան այս առիթով հարցում էր ուղարկել արտգործնախարարություն. պատասխանը նշում է, որ տեղյակ են խնդրին, ելքեր են փնտրում, հարցը բարձրացվել է նաև երկու երկրների արտգործնախարարների հեռախոսազրույցի ժամանակ։
Ու մինչև գերատեսչությունները քննարկում են, բեռնափոխադրողները կորուստներ են կրում ոչ միայն վառելիքի գնի, այլ նաև մեքենայի բաքում դրա քանակով պայմանավորված տուգանքների պատճառով։ Թեման Sputnik Արմենիան խնդրել է մանրամասնել «Սպայկա» ընկերության կարգավարական բաժնի ղեկավար Կարեն Աղդայանին։