ԵՐԵՎԱՆ, 26 նոյեմբերի – Sputnik. Սարատովի մարզում 100 տարեկանում մահացել է հայտնի ճանապարհային կարգավորող, Հայրենական մեծ պատերազմի մասնակից Լիմանսկայա Մարիա Ֆիլիպովնան։ Տեղեկությունը հայտնել է մարզպետ Ռոման Բուսարգինը Telegram–ում։
Մեծ հաղթանակի երթևեկության կարգավար Մարիա Լիմանսկայան 1994 թվականից բնակվում էր Սարատովի մարզի Զվոնարյովկա գյուղում։ Լիմանսկայային 1945 թվականի մայիսին Բրանդենբուրգյան դարպասների մոտ լուսանկարել էր Եվգենի Խալդեյը, իսկ ավելի ուշ ամբողջ աշխարհը նրան սկսեց անվանել Բրանդենբուրգյան մադոննա: 2020 թվականին Մարքս քաղաքում կանգնեցվեց «Հաղթանակի մադոննա» հուշարձանը՝ նվիրված հայտնի կարգավարին։
Մարիա Լիմանսկայա
© Photo : РИА Новости
«Այս գիշեր կյանքից հեռացավ Լիմանսկայա Մարիա Ֆիլիպովնան՝ ամբողջ աշխարհին հայտնի Բրանդենբուրգյան մադոննան։ Մարիա Ֆիլիպովնան դժվարին, բայց վառ ճակատագրով զարմանալի անձնավորություն է... Ցավակցում եմ հարազատներին և մերձավորներին։ Սա մեծ կորուստ է բոլորիս համար։ Հպարտ եմ, որ անձամբ եմ ճանաչել Մարիա Ֆիլիպովնային»,- նշել է Բուսարգինը:
Մարիա Լիմանսկայան ծնվել է 1924 թվականին Վոլգոգրադի մարզի Ստարայա Պոլտավկա գյուղում։ 1942 թվականի գարնանը նա 18 տարեկանում մեկնել է ռազմաճակատ, ծառայել պահեստային գնդում և հագուստ կարել խորհրդային զինվորների համար։ Եռօրյա պատրաստությունից հետո դարձել է երթևեկության կարգավար։ Մարտական մկրտությունը Մարիա Ֆիլիպովնան ստացել է Ռոստովի մարզի Բատայսկ քաղաքի մոտ։ Թշնամու կրակի տակ նա կարգավորում էր զորքերի տեղաշարժը Դոնի վրայով անցնող անցատեղում: Մասնակցել է Ստալինգրադի ճակատամարտին, Սիմֆերոպոլի, Բելառուսի և Լեհաստանի ազատագրմանը, հասել է Բեռլին։ Պատերազմից հետո Վոլգոգրադի մարզում աշխատել է որպես բուժքույր, իսկ հետո` գրադարանավար դպրոցում։