ԱՄՆ–ն վետո է դրել Գազայում հրադադարի մասին ՄԱԿ-ի ԱԽ բանաձևի նախագծի վրա

ԵՐԵՎԱՆ, 20 նոյեմբերի – Sputnik. ԱՄՆ-ն վետո է դրել ՄԱԿ-ի Անվտանգության խորհրդի բանաձևի նախագծի վրա, որը պահանջում է անհապաղ, անվերապահ և մշտական հրադադար հաստատել Գազայի հատվածում և ազատ արձակել բոլոր պատանդներին։ Տեղեկությունը հայտնում է ՌԻԱ Նովոստին:

Նշվում է, որ բանաձևի նոր նախագիծը պատրաստել են ՄԱԿ-ի Անվտանգության խորհրդի 10 ոչ մշտական անդամները:

Կողմերից պահանջվում է ամբողջությամբ, անվերապահորեն և առանց հապաղելու կատարել 2735 բանաձևը (Ջո Բայդենի՝ փուլային հրադադարի հաստատման մասին պլանով)։

Տեքստում առանձին նշվում է պաղեստինցի փախստականների օգնության և աշխատանքների կազմակերպման համար ՄԱԿ-ի մերձավորարևելյան գործակալության դերը, նախագիծը կողմերին կոչ է անում կառույցին հնարավորություն տալ կատարելու իր մանդատը:

Բանաձևի նախագիծը նաև կողմերից պահանջում է միջազգային իրավունքի շրջանակներում պահպանել պահվող անձանց նկատմամբ պարտականությունները, ինչպես նաև կոչ է անում լիովին պահպանել միջազգային մարդասիրական իրավունքը, հատկապես քաղաքացիական անձանց և օբյեկտների պաշտպանության մասով:

Հիշեցնենք` 2023 թ. հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Դրանից հետո պաղեստինյան ՀԱՄԱՍ շարժման գրոհայինները ներխուժեցին սահմանամերձ շրջաններ՝ կրակ բացելով զինվորականների և քաղաքացիական անձանց վրա։ Նրանք պատանդ վերցրին ավելի քան 200 անձանց: Իշխանությունների տվյալներով՝ իսրայելական կողմից այդ ժամանակ զոհվեց մոտ 1,2 հազար մարդ։

Իսրայելի պաշտպանության բանակն ի պատասխան սկսեց «Երկաթե թրեր» գործողությունը և հայտարարեց Գազայի հատվածի ամբողջական շրջափակման մասին. դադարեցվեցին ջրի, էլեկտրականության, վառելիքի, սննդամթերքի և դեղորայքի մատակարարումները: Գազայի առողջապահության նախարարության տվյալներով՝ հակամարտության մեկնարկից ի վեր մահացել է ավելի քան 42 հազար պաղեստինցի, ավելի քան 100 հազարը` տուժել։