Իսրայելը հարվածներ է հասցրել Լիբանանի հարավում գտնվող բիզնես կենտրոնին, զոհեր կան. կադրեր

Իսրայելական մարտական ավիացիան հարվածներ է հասցրել Լիբանանի հարավում գտնվող Նաբաթիա քաղաքի բիզնես կենտրոնին, ինչի հետևանքով երկու մարդ է մահացել։ Տեղեկությունը հայտնում է ՌԻԱ Նովոստին՝ հղում անելով Լիբանանի բժշկական ծառայության աղբյուրին։

Նաբաթիա քաղաքը հարավային Լիբանանի շրջանային կենտրոններից մեկն է։ Իսրայելի զանգվածային ռմբակոծությունների մեկնարկից հետո բնակչության մեծ մասը լքել է քաղաքը, քաղաքապետարանի տվյալներով` ավերվել է քաղաքացիական ենթակառուցվածքների ավելի քան 50%-ը: Հոկտեմբերին Իսրայելի ռազմաօդային ուժերը հարձակվել էին տեղական վարչակազմի շենքի վրա, ինչի հետևանքով մահացել էին Նաբաթիայի քաղաքապետը և մի քանի պետծառայողներ։

Հիշեցնենք` Իսրայելը հոկտեմբերի 1-ից Լիբանանի հարավում ցամաքային գործողություն է իրականացնում «Հզբոլլահի» ուժերի դեմ և շարունակում հրթիռակոծել հարևան երկիրը, որտեղ արդեն ավելի քան 2 հազար մարդ է զոհվել, ավելի քան մեկ միլիոն անձ փախստական է դարձել: Չնայած կորուստներին (այդ թվում՝ հրամանատարական կազմում)` «Հզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:

Իսրայելը նշում է, որ ռազմական արշավի գլխավոր նպատակն է պայմաններ ստեղծել հյուսիսի 60 հազար բնակիչների վերադարձի համար, որոնք մեկ տարի առաջ տարհանվել են «Հզբոլլահի» կողմից պաղեստինյան ՀԱՄԱՍ շարժմանն աջակցելու համար սկսված գնդակոծությունների պատճառով:

Իրավիճակը կրկին սրվեց սեպտեմբերի 17-ին և 18-ին Լիբանանի տարբեր շրջաններում կապի միջոցների զանգվածային պայթյուններից հետո, որոնց հետևանքով տասնյակ մարդիկ մահացան, շուրջ 3 հազար քաղաքացիներ վիրավորվեցին: Ավելի ուշ իսրայելական ավիացիան հարվածեց Բեյրութի հարավային արվարձանում գտնվող բնակելի շենքին, ինչի հետևանքով մահացավ ավելի քան 50 մարդ, այդ թվում՝ «Հզբոլլահի» հատուկ գործողությունների ուժերի հրամանատար Իբրահիմ Աքիլը:

Շիա զինյալներն ի պատասխան հարձակվեցին Իսրայելի ՌՕՈւ «Ռամաթ-Դավիդ» բազայի և Հայֆայի հյուսիսում գտնվող «Ռաֆայել» ռազմարդյունաբերական համալիրի վրա: Մի քանի հրթիռ պայթեց Հայֆայի բնակելի թաղամասերում։