ԵՐԵՎԱՆ, 18 նոյեմբերի – Sputnik. ՀՀ քննչական կոմիտեի նախագահ Արգիշտի Քյարամյանը պաշտոնից հրաժարվելու որոշում է կայացրել։ Նա այդ մասին հայտնել է իր ուղերձում, որը հրապարակվել է ՔԿ–ի կայքում։
Քյարամյանն ընդգծել է, որ նույն հպարտությամբ և ներդաշնակությամբ է հեռանում նախագահի պաշտոնից, ինչպես ստանձնել է այն։
«Եկել է պահը հայտնելու Ձեզ՝ Հայաստանի Հանրապետության քննչական կոմիտեի նախագահի պաշտոնից հրաժարվելու՝ իմ կայացրած որոշման մասին։ Այն բխում է վերջին շրջանում ընդհանուր իրավապահ համակարգի գործունեության շուրջ ստեղծված իրավիճակից ածանցվող ներքին վերագնահատումներից։ Ի պաշտոնե հնարավոր ամեն ինչ արվել է մեր պետության ներքին կենսունակությունն ու օրինահենությունը, իրավական անվտանգությունն ապահովելու համար»,– գրել է Քյարամյանը։
Նա վստահություն է հայտնել, որ ՀՀ–ում շարունակվող դատաիրավական, իրավապահ մարմինների բարեփոխումները, ՀՀ քննչական կոմիտեի հետագա զարգացման ուղեցույցը լինելու է շարունակական։
Նշենք, որ Արգիշտի Քյարամյանը ՀՀ ՔԿ նախագահ էր նշանակվել 2021 թվականի հուլիսի 12-ին։
Հիշեցնենք` կառավարության վերջին նիստում ՀՀ վարչապետ Նիկոլ Փաշինյանը հայտարարեց, որ իր համբերության բաժակը լցվել է և իրավապահ համակարգից կոնկրետ արդյունքներ է պահանջում։ Ավելի ուշ լրատվամիջոցները գրեցին, որ Փաշինյանը կիրակի երեկոյան կադրային ջարդ է իրականացրել կառավարությունում և իրավապահ համակարգում, ինչի արդյունքում ՏԿԵ նախարար Գնել Սանոսյանը և ՀՀ ՊԵԿ նախագահ Ռուստամ Բադասյանը, ՔԿ ղեկավար Արգիշտի Քյարամյանը, ինչպես նաև ՆԳ նախարար Վահե Ղազարյանը աշխատանքից ազատվելու դիմումներ են ներկայացրել։
Բարձրագույն դատական խորհրդի նախագահ Կարեն Անդրեասյանն այսօր ֆեյսբուքյան էջում գրեց, որ հրաժարական է տալիս` առանց խոսելու խորքային պատճառների մասին։
Ավելի ուշ հայտնի դարձավ, որ ազատման դիմումներ են գրել նաև Հակակոռուպցիոն կոմիտեի նախագահ Սասուն Խաչատրյանը և ՀՀ ներքին գործերի նախարար Վահե Ղազարյանը։
ՀՀ վարչապետ Նիկոլ Փաշինյանն այսօր հաստատեց, որ հենց ինքն է նախաձեռնել պաշտոնանկությունների գործընթացը։