Սուխումի խորհրդարանի շենքի մոտ, որտեղ նախատեսվում էր քննարկել Ռուսաստանի հետ ներդրումային համաձայնագիրը, բախում է տեղի ունեցել ուժայինների և բողոքի ակցիայի մասնակիցների միջև։ Տեղեկությունը հայտնում է Sputnik Աբխազիան։
Ցուցարարները բեռնատարով կոտրել են դարպասը և փորձել են ներխուժել խորհրդարանի տարածք։ Նրանք ուժայինների վրա ձվեր ու պլաստիկ շշեր են նետել։
Իրավապահները ցանկացել են բեռնատարով փակել տարածքը, սակայն ցուցարարները կոտրել են մեքենայի ապակիները, ապա պարսպի մի մասը։
Ուժայիններն արցունքաբեր գազ են կիրառել, ի պատասխան ցուցարարները նրանց ուղղությամբ ճայթռուկներ են նետել։
Ավելի վաղ պատգամավորները փաստաթղթի վավերացման հարցի քննարկումը հետաձգել էին իրենց նկատմամբ ճնշում գործադրելու պատճառով։
Ցուցարարները պահանջում են անհապաղ նիստ հրավիրել և դեմ քվեարկել փաստաթղթին։
Համաձայնագիրը դժգոհություն է առաջացրել աբխազական ընդդիմության շրջանում. Ընդդիմադիրները կարծում են, որ փաստաթուղթը թույլ է տալիս այնպիսի շինություններ կառուցել, որոնց վերաբերյալ օրինագիծը խորհրդարանն ավելի վաղ մերժել էր։
Հոկտեմբերի 30-ին Մոսկվայում ստորագրված համաձայնագիրը ռուսական ընկերություններին թույլ է տալիս ներդրումային ծրագրեր իրականացնել Աբխազիայի տարածքում։ Ինչպես ավելի վաղ հայտարարել էր Աբխազիայի խորհրդարանի միջազգային կապերի հանձնաժողովի ղեկավար Ալխաս Բարցիցը, Աբխազիան ինքնուրույն չի կարողանա միջոցներ գտնել իր տնտեսության առանցքային, հիմնարար ոլորտները վերականգնելու համար։