ԵՐԵՎԱՆ, 13 նոյեմբերի – Sputnik. Էլեկտրամոբիլների վրա կիրառվող «տարիքային» 2 տարվա սահմանափակումը կհանվի։ Այդ մասին Ազգային ժողովում կառավարության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը։
Նա պատասխանեց ՀՀ ԱԺ «Քաղաքացիական պայմանագիր» խմբակցության պատգամավոր Նարեկ Բաբայանի այն հարցին, որ շուրջ 1000 քաղաքացի էլեկտրամեքենա է գնել անհատներից այն ակնկալիքով, որ դրանք կհասնեն հունվարին։
«Մինչդեռ հիմա դրանց մի մասը հասել է, սակայն քանի որ տարեկան 8000–ի քվոտան սպառված է, սպասում են, որ մաքսազերծումն անեն հունվարի 1–ից հետո։ Խնդիրն այն է, որ այս քաղաքացիները վստահել են պետությանը, իմացել են խաղի կանոնները, և հիմա այս մարդիկ ուզում են հասկանալ` արդյոք իրենց նկատմամբ արդարություն կլինի, թե ոչ»,– հետաքրքրվեց նա։
ՀՀ վարչապետ Նիկոլ Փաշինյանն ասաց, որ անձամբ ինքը չի ուզում, սակայն էլեկտրամոբիլների համար կիրառվող երկու տարվա սահմանափակումը կհանեն, և հունվարի 1–ից կիրականացվի համապատասխան որոշումը։
«Կարծում եմ, որ պետական մարմինները ճիշտ չեն կոմունիկացրել հարցը, և միայն այդ պատճառով այդ որոշումը պետք է կայացնենք։ Այս և շատ հարցերում մենք ստիպված ենք լինում կայացնելու ոչ ճիշտ որոշումներ, քանի որ նախկինում կայացված որոշումները բավարար չափով համապատասխան չեն եղել պետականության տրամաբանությանը։ Մի իքս պահի այս գործելաոճը պետք է դադարեցնենք, քանի որ այսպես պետություն չենք կառուցի։ Հիմա մենք պետք է չուզելով այս հարցը լուծենք»,– հայտարարեց նա։
Վարչապետն ասաց, որ 2025 թվականի քվոտաները բաժանվելու են հետևյալ տրամաբանությամբ` 5000 քվոտա քաղաքացիներին, 3000–ը` դիլերներին` պաշտոնական ներկայացուցիչներին։
Հիշեցնենք` ԵԱՏՄ անդամ երկրների համար էլեկտրամոբիլների ներկրման քվոտա առաջին անգամ սահմանվել է 2022 թվականի մարտին։ Հայաստանի համար այդ որոշմամբ սահմանվել էր 7 000 ավտոմեքենայի անմաքս ներկրման իրավունք։ Ու թեև ամբողջ տարվա ընթացքում այդ քվոտայից սպառվել էր միայն 2680–ը, հաջորդ` 2023թ–ի համար Հայաստանին տրամադրվել էր 8000 ավտոմեքենայի քվոտա, որը դարձյալ ամբողջությամբ չէր սպառվել (2023 թ–ին ՀՀ է ներկրվել գրեթե 4500 էլեկտրամոբիլ)։ Իսկ ահա 2024 թվականին սկսեցին ավելի շատ էլեկտրամոբիլներ ներկրել (նաև այն պատճառով, որ հանրապետությունում ընդլայնվել է լիցքավորման ցանցը)։