Երևանն ու Բաքուն խաղաղության պայմանագրի քննարկումը կվերսկսեն դեկտեմբերին. Հաջիև

ԵՐԵՎԱՆ, 13 նոյեմբերի – Sputnik. Հայաստանն ու Ադրբեջանը խաղաղության պայմանագրի քննարկումը կվերսկսեն դեկտեմբերին։ Այս մասին Բաքվում անցկացվող ՄԱԿ–ի Կլիմայի փոփոխության համաժողովի (СОР–29) ժամանակ «ՏԱՍՍ»–ին հայտնել է Ադրբեջանի նախագահի օգնական Հիքմեթ Հաջիևը։

Նա ընդգծել է, որ այժմ Ադրբեջանի օրակարգում СОР–29–ն է, ու դա շարունակվելու է մինչև ընթացիկ ամսվա վերջ։

Նրա խոսքով` փաստաթղթում դեռ չհամաձայնեցված հարցեր կան, այդ պատճառով էլ կողմերը քննարկումներն ու բանակցությունները շարունակում են փորձագետների մակարդակով։

Նշենք, որ նոյեմբերի 12-ին էլ Ադրբեջանի ԱԳ նախարար Ջեյհուն Բայրամովն էր անդրադարձել պայմանագրին առնչվող հարցերին ու ընդգծել, որ գագաթնաժողովին Հայաստանի պատվիրակության չմասնակցելը հնարավորության բացթողում է։

Հայկական ԶԼՄ-ներում ավելի վաղ հրապարակումներ են եղել այն մասին, որ Երևանը գագաթաժողովին իր մասնակցությունը պայմանավորում է Բաքվի բանտերից հայ գերիների ազատ արձակմամբ: Պաշտոնյաները դա չէին հաստատում, սակայն ճեպազրույցներից մեկի ժամանակ ԱԺ նախագահ Ալեն Սիմոնյանը հայտարարեց, որ եթե COP–29-ին Հայաստանի մասնակցության հարցը կապվի գերիների վերադարձի կամ որևէ այլ դրական որոշման հետ, ապա անպայման պետք է մասնակցել։ Նա նաև հայտնեց, որ հոկտեմբերին Կազանում ԲՐԻԿՍ+ գագաթնաժողովում Փաշինյանն ու Ալիևը քննարկել են գերիների հարցը։

Հավելենք, որ հայկական կողմը խաղաղության պայմանագրի վերաբերյալ հերթական առաջարկներն Ադրբեջանին է ուղարկել օգոստոսի վերջին։

Օգոստոսի 31-ին կայացած մամուլի ասուլիսի ժամանակ ՀՀ վարչապետ Նիկոլ Փաշինյանը հայտնեց, որ 16 հոդվածից 13-ը համաձայնեցված է. Ադրբեջանին առաջարկել են ստորագրել խաղաղության պայմանագրի համաձայնեցված կետերը և հետագայում աշխատել մնացածի վրա:

Իլհամ Ալիևն իր հերթին սեպտեմբերի 23-ին Ադրբեջանի խորհրդարանում «ոչ ադեկվատ և պարզունակ» որակեց հայկական ղեկավարության գործողությունները։

Նոյեմբերի 5–ին հայտնի դարձավ, որ Հայաստանը խաղաղության պայմանագրի նախագծի վերաբերյալ պատասխան առաջարկներ է ստացել Ադրբեջանից։