ԵՐԵՎԱՆ, 10 նոյեմբերի – Sputnik. Շիրակի մարզի Գետք գյուղում խոշոր ավտովթար է տեղի ունեցել, որի հետևանքով կա 1 զոհ և 4 տուժած։ Տեղեկությունը հայտնում է ՆԳՆ փրկարար ծառայությունը։
Նշվում է, որ վթարի մասին Շիրակի մարզային փրկարարական վարչության ճգնաժամային կառավարման կենտրոն ահազանգը ստացվել է նոյեմբերի 9-ին, ժամը 20:56-ին։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:
Գետք գյուղում խոշոր ավտովթար է տեղի ունեցել
© Photo : press office of the Rescue Service of the MIA of RA
Պարզվել է, որ Գետք գյուղի վերջնամասում բախվել են «VAZ» մակնիշի ավտոմեքենան (վարորդ՝ Հ. Գ., ծնված 1957 թ.) և «KamAZ» մակնիշի բեռնատարը (վարորդ Ա. Բ., ծնված 1984 թ.):
«Մինչ փրկարարների կանչի վայր հասնելը՝ «VAZ» –ի վարորդը, ուղևորներ Ա. Ա.-ն (ծնված 1990 թ.), Ջ. Հ.-ն (ծնված 2011 թ.), Հ. Հ.-ն (ծնված 2014 թ.) և Ա. Հ.-ն (ծնված 2022 թ.) տեղի ուժերով դուրս են բերվել ավտոմեքենայից: Տեղում բժիշկները արձանագրել են Հ. Գ.-ի մահը, իսկ տուժածները տեղափոխվել են բժշկական կենտրոններ»,-նշված է հաղորդագրության մեջ։
Փրկարարները հոսանքազրկել են «VAZ» մակնիշի ավտոմեքենան, փակել գազի բալոնի փականը և բեռնատարի կցորդիչը մասամբ հեռացրել երթևեկելի գոտուց: