ԵՐԵՎԱՆ, 8 նոյեմբերի – Sputnik, Խաչիկ Չախոյան. Սպորտային մարմնամարզության Հայաստանի հավաքականի առաջատարներից մեկը՝ Հարություն Մերդինյանը, հայտարարել է, որ ավարտում է սպորտային կարիերան։
Sputnik Արմենիայի հետ զրույցում Մերդինյանը նշեց, որ պատճառն առողջական խնդիրներն են։
«Մրցումային գրաֆիկն այնպիսին է, որ ես պարզապես չեմ հասցնում ապաքինվել վնասվածքներից։ Դաստակի, մեջքի, ուսի վնասվածքներս արդեն քրոնիկական են դարձել, ու կարծում եմ` դա արդեն տարիքի հետ է կապված»,–ասաց մարզիկը։
Մերդինյանն արդեն 40 տարեկան է, բայց նրանք, ովքեր ճանաչում են նրան, կարող են վստահեցնել, որ նա նույն ակտիվությամբ աշխատում է մարմնամարզության դպրոցում։ Մերդինյանը վստահեցրեց, որ հեռանում է մրցասպարեզից, բայց ոչ սիրած մարզաձևից. շարունակելու է աշխատանքը Ալբերտ Ազարյանի անվան մարզադպրոցում և օգնելու է մարզիչներին։
«Եթե հանկարծ որոշեմ նորից վերադառնալ, ապա առաջինը ձեզ կտեղեկացնեմ», - կատակեց Մերդինյանը։
Նշենք, որ Հարություն Մերդինյանն այն մարմնամարզիկներից է, որոնք հետ բերեցին մարմնամարզությունում հայկական դպրոցի բարի ավանդույթները։
Ցավալի վրիպման պատճառով Հարությունը չկարողացավ մեդալ վաստակել Ռիո-2016-ի օլիմպիական խաղերում, նժույգ թափեր վարժությունում Եվրոպայի կրկնակի չեմպիոն է (2016, 2022), աշխարհի առաջնության (2015, 2022) բրոնզե մեդալակիր։