ԵՐԵՎԱՆ, 6 նոյեմբերի – Sputnik. Գյումրիի ավագանու «Քաղաքացիական պայմանագիր» խմբակցության նախաձեռնությամբ նոյեմբերի 8–ին ժամը 11:00–ին համայնքի ղեկավարի արտահերթ ընտրության նիստ է նշանակվել: NEWS.am–ին այդ մասին հայտնել է ավագանու ՀՀԿ խմբակցության ղեկավար Նարեկ Միրզոյանը։
Հոկտեմբերի 28-ին հայտնի դարձավ, որ Գյումրու ավագանու «Բալասանյան դաշինք» խմբակցության 14 անդամները՝ քաղաքապետ Վարդգես Սամսոնյանի գլխավորությամբ, մանդատից հրաժարվելու վերաբերյալ արձանագրություն են ներկայացրել թիվ 31 ընտրատարածքային ընտրական հանձնաժողով: Ավելի վաղ «Զվարթնոց» օդանավակայանում ձերբակալվել է Գյումրու նախկին քաղաքապետ Սամվել Բալասանյանի որդին՝ Խաչատուր Բալասանյանը։ Ավելի ուշ հայտնի դարձավ, որ ձերբակալելու որոշում կա նաև Սամվել Բալասանյանի մասով։
Միրզոյանը նաև նշել է, որ իրենց խմբակցությունը չի մասնակցելու այդ նիստին:
«Մենք ի սկզբանե հայտարարել ենք, որ ՔՊ կուսակցության որևիցե նախաձեռնության մենք չենք մասնակցելու, բացառապես այն մասով, որ ՔՊ-ն մշտապես փորձ է արել Գյումրիում իշխանազավթման հասնել, նաև այն համայնքներում, որտեղ ՔՊ-ական ղեկավարներ չկան, նշանակել ՔՊ-ական ղեկավարներ»,– ասել է նա:
Լրատվամիջոցի փոխանցմամբ` ավագանու անդամը նաև նշել է` թեև «Քաղաքացիական պայմանագիր» խմբակցությունը կարող է նիստ հրավիրել, սակայն չի կարող քվորում ապահովել:
«ՔՊ–ն 33 մանդատից 11–ն ունի, ինչը թույլ է տալիս նիստ հրավիրել, բայց գումարման համար 17 ավագանու անդամի ներկայություն է անհրաժեշտ»,– նշել է նա:
Նրա կարծիքով` նման իրավիճակում ճիշտը արատահերթ ընտրությունների գնալն է, այլ ոչ թե ՔՊ–ի օրակարգով շարժվելը:
Հիշեցնենք, որ հոկտեմբերի 28-ին հայտնի դարձավ, որ Գյումրու ավագանու «Բալասանյան դաշինք» խմբակցության 14 անդամները՝ քաղաքապետ Վարդգես Սամսոնյանի գլխավորությամբ, մանդատից հրաժարվելու վերաբերյալ արձանագրություն են ներկայացրել թիվ 31 ընտրատարածքային ընտրական հանձնաժողով: Ավելի վաղ «Զվարթնոց» օդանավակայանում ձերբակալվել է Գյումրու նախկին քաղաքապետ Սամվել Բալասանյանի որդին՝ Խաչատուր Բալասանյանը։ Ավելի ուշ հայտնի դարձավ, որ ձերբակալելու որոշում կա նաև Սամվել Բալասանյանի մասով։
Գյումրու քաղաքապետի ընտրություններում ՔՊ-ի թեկնածուն Կարեն Սարուխանյանն է։
Հավելենք, որ մամուլում շրջանառվող լուրերի համաձայն` Գյումրու քաղաքապետի հրաժարականի հարցը քննարկվում էր դեռ ամիսներ առաջ, քանի որ իշխող կուսակցությունը ուզում է միանձնյա ղեկավարել քաղաքը ու դրա համար ցանկանում էր գնալ արտահերթ ընտրությունների. ՔՊ-ն իր թեկնածուն ունի՝ ԱԺ պատգամավոր Կարեն Սարուխանյանը։