ԵՐԵՎԱՆ, 6 նոյեմբերի – Sputnik. Հայաստանի մարզերի երիտասարդ ակտիվիստները Երևանում կմասնակցեն առաջնորդների համաժողովին, որը տեղի կունենա ԵՊՀ-ում նոյեմբերի 7-11-ը:
Համաժողովի բացմանը կմասնակցեն պետական մարմինների ներկայացուցիչներ, քաղաքական և հասարակական գործիչներ, դիվանագետներ և փորձագետներ:
Զարգացման առաջնորդների համաժողովը Հայաստանի բոլոր մարզերի երիտասարդների համար նորարարական միջազգային նախագիծ է, որի նպատակն է համակողմանի զարգացնել առաջնորդական հմտությունները: Առաջին համաժողովը տեղի է ունեցել 2023 թվականին Գյումրիում և նվիրված էր Հայաստանի տարածքների զարգացման գաղափարների մշակմանը։
2024 թվականի համաժողովի թեման ինտելեկտուալ առաջնորդությունն է։
Համաժողովի շրջանակներում երիտասարդ առաջնորդները կկարողանան մասնակցել ինտելեկտուալ լիդերության և մենթորության թեմաներով վարպետության դասերի, դասախոսությունների, թիմային խաղերի, նախագծային աշխատանքների: Համաժողովի մասնակիցները կծանոթանան նաև երիտասարդական միջավայրում ինտելեկտուալ առաջնորդության հաջողված օրինակներին և գիտա-լուսավորչական, երիտասարդական և մեդիագործունեության ոլորտի փորձագետների հետ համատեղ կմշակեն սեփական երիտասարդական ակումբի նախագիծը:
Երիտասարդական ինտելեկտուալ ակումբների ստեղծման նպատակն է բարձրացնել երիտասարդների ներգրավվածությունն ակումբային գործունեությանը, ինչը խթան կհանդիսանա Հայաստանի նորարարական զարգացման համար: Ժյուրիի անդամների կողմից ընտրված լավագույն նախագծերը համաժողովի կազմակերպիչներից կստանան աջակցություն: Բոլոր մասնակիցներին կտրվեն հավաստագրեր:
«Զարգացման առաջնորդների համաժողով-2024. ինտելեկտուալ առաջնորդություն»-ը կազմակերպում է «Հաղորդակցությունների զարգացման միջազգային ինստիտուտ» մարդասիրական հիմնադրամը («ՄԻՐ» հիմնադրամ, Հայաստան)՝ հաղորդակցությունների զարգացման ազգային հետազոտական ինստիտուտի (ՀԶԱՀ, ՌԴ) հետ համագործակցությամբ։