ԵՐԵՎԱՆ, 4 նոյեմբերի – Sputnik. Հայկական արտադրանքի որակի հետ կապված հարցեր նախկինում էլ են եղել, պարզապես հիմա մի շարք երկրներում սկսել են ավելի մեծ ուշադրություն դարձնել դրան։ ԱԺ ֆինանսավարկային և բյուջետային հարցերի հանձնաժողովում 2025 թվականի պետական բյուջեի նախագծի քննարկման ժամանակ այդ մասին ասաց ՀՀէկոնոմիկայի նախարար Գևորգ Պապոյանը։
«Երբ դու դադարում ես ինքնիշխանությունդ ծիրանի դիմաց վաճառել, սկսում են ուշադրություն դարձնել որակի թերություններին, ինչը միանգամայն նորմալ է», - նշեց նախարարը:
Պապոյանը հավելեց` որակը պահպանելու անհրաժեշտությունը չի վերաբերում որևէ կոնկրետ շուկայի, քանի որ այժմ Եվրամիության և Եվրասիական միության չափանիշները բավականին մոտ են, այդ պատճառով բիզնեսի համար նախատեսվող պետական աջակցության միջոցներն ուղղված են ոչ միայն արտադրողականության, այլև որակի բարձրացմանը։
Նրա խոսքով` օրինակ` Հայաստանում գործում է առնվազն երկու ձեռնարկություն, որոնք պատրաստ են կաթը գնել մեկ լիտրի դիմաց 300 դրամով (80 ցենտից մի փոքր պակաս կամ միջին գնից գրեթե կրկնակի բարձր. խմբ)։ Այլ բան է, որ նման կաթի մեջ մանրէների պարունակությունը պետք է 20-30 անգամ քիչ լինի, քան 150-160 դրամ արժեցող կաթի։
«Ուստի մենք աջակցություն ենք առաջարկում նոր սարքավորումներ ձեռք բերելու հարցում՝ և՛ կթելու, և՛ արտադրության շատ այլ օղակների համար», - ասաց Պապոյանը։
Այս կապակցությամբ նա նշեց, որ պետական աջակցության ծրագրով (վարկի կամ լիզինգի տոկոսների սուբսիդավորում) վերջին 3 տարում Հայաստան է ներմուծվել մոտ 1 մլրդ դոլարի ժամանակակից սարքավորումներ, այդ թվում՝ 308 մլրդ (գրեթե 800 մլն դոլար)՝ արդյունաբերությունում և մոտ 60 մլրդ (150 մլն դոլար)՝ գյուղատնտեսությունում։