ԵՐԵՎԱՆ, 31 հոկտեմբերի – Sputnik. Մի խումբ քաղաքացիներ Էրեբունու ձերբակալվածների պահման վայրի դիմաց ակցիա են անցկացնում ի պաշտպանություն այնտեղ գտնվող 9 քաղաքացիների։
Ձերբակալվածների թվում են պետական կառավարման մասնագետ, տնտեսագետ Հովհաննես Ավետիսյանը, ինչպես նաև 44–օրյա պատերազմում զոհված Արման Ազատյանի հայրը` Վիգեն Ազատյանը։
Քաղաքացիները ՁՊՎ–ի մոտ են եկել պաստառներով, որոնց վրա գրված է. «Անհապաղ ազատ արձակել ապօրինի ձերբակալվածներին»։
Հավաքվածները նշում են, որ իրավապահները ընդդիմադիր հայացքներ ունեցող քաղաքացիներին հերթով տարել են 24 ժամվա ընթացքում, հիմնականում` ապօրինի զենք պահելու մեղադրանքով։
«Բոլորին էլ բերման են ենթարկել, ձերբակալել անօրինական նույն սցենարով՝ կանգնեցնում են մեքենաները, թե օպերատիվ տեղեկություններ կան անօրինական զենք պահելու մասին»,– այս մասին իր ֆեյսբուքյան էջում գրել է ՀՀ ԱԺ «Հայաստան» խմբակցության պատգամավոր Գեղամ Մանուկյանը։
Քիչ առաջ ձերբակալվածներին են այցելել ՀՀ ԱԺ պատգամավորներ Ասպրամ Կրպեյանն ու Գառնիկ Դանիելյանը։ Նրանք հայտնել են, որ անազատության մեջ գտնվողները մարտական են տրամադրված։
Ակցիայի մասնակիցները հայտնեցին, որ վաղը` նոյեմբերի 1-ին, ժամը 15․00-ին նույն հարցով ակցիա են իրականացնելու ՀՀ մարդու իրավունքների պաշտպանի գրասենյակի մոտ։