ԵՐԵՎԱՆ, 30 հոկտեմբերի – Sputnik. 2025 թ. մայիս–հունիսին, երբ ՀՀ բարձր տեխնոլոգիական արդյունաբերության նախարարությունը կունենա ոլորտի ռազմավարություն, նախանշված կլինեն հիմնական երկու–երեք ուղղություններ, որոնցում ՀՀ–ն կձգտի չեմպիոնության։ ԲՏԱ նախարար Մխիթար Հայրապետյանն այս հայտարարությունն արեց Ազգային ժողովի պետական–իրավական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստի ժամանակ։
Նա ընդգծեց, որ տարածաշրջանում Հայաստանի դիրքերը ձգտելու են բարելավել հատկապես միկրոէլեկտրոնիկայի, ռոբոտաշինության ուղղություններով։
«Հայաստան» խմբակցության պատգամավոր Թադևոս Ավետիսյանին հետաքրքրեց ռազմարդյունաբերության ոլորտը։ Նա հայտարարեց, որ 2024 թվականին ԲՏԱ նախարարությունը նախատեսված 5 ծրագրից միայն 4–ն է կատարել, և, ըստ էության, ռազմաարդյունաբերությունն ունեցել է զրոյական կատարողական։
Թեմայի վերաբերյալ նրա այս և մյուս դիտարկումները բուռն բանավեճի թեմա դարձան։
Հայրապետյանը հայտարարեց, որ 2024 և 2025 թվականների ռազմարդյունաբերության բյուջեներն ըստ էության նույնն են մնացել, չի բացառվում` եկող տարի նաև մի փոքր ավելացում լինի։
«Ռազմարդյունաբերությունն այն ոլորտն է, որն ունի գաղտնիության բաղադրիչ։ Ես հիմա այս զեկույցի ժամանակ խոսում եմ այն ոլորտների մասին, որոնք գաղտնիություն չունեն։ Ռազմարդյունաբերության մասին մենք խոսել ենք գաղտնիության ռեժիմով փակ հանդիպմանը, որին դուք չեք մասնակցել։ Դուք միտումնավո՞ր եք փորձում ինձ հիմա սադրել, որ ես անցնե՞մ սահմանը»,– ի պատասխան հայտարարեց Հայրապետյանը։
Թադևոս Ավետիսյանը չշարունակեց բանավեճը և բարկացած դուրս եկավ քննարկումների դահլիճից։
Ի դեպ, ընդդիմադիր խմբակցությունների պատգամավորները 2025 թ. պետական բյուջեի քննարկումներին այսօր ներկա չէին, իսկ Ավետիսյանը մասնակցեց միայն ԲՏԱ բյուջեի ներկայացմանը։