ԵՐԵՎԱՆ, 28 հոկտեմբերի – Sputnik. Թուրքիայում մառախուղի պատճառով երկկողմանի դադարեցվել է Բոսֆորի նեղուցով նավերի տարանցումը։ Տեղեկությունը հայտնում է Թուրքիայի տրանսպորտի նախարարությունը։
«Բոսֆորի նեղուցով նավերի տարանցումը դադարեցվել է մառախուղի հետևանքով առաջացած սահմանափակ տեսանելիության պատճառով», – ասվում է գերատեսչության հաղորդագրության մեջ։
Նշվում է, որ շուրջ 70 նավ է սպասում նեղուցով անցնելու հերթին։ Չեղարկվել են նաև մարդատար լաստանավերի ուղերթերը։