ՀՀ բարձրաստիճան պաշտոնյաները Եռաբլուրի փոխարեն ԱԺ բակում են հարգանքի տուրք մատուցել

ՀՀ վարչապետ Նիկոլ Փաշինյանը ՀՀ նագախահ Վահագն Խաչատուրյանի և ՀՀ Աժ նախագահ Ալեն Սիմոնյանի հետ հարգանքի տուրք է մատուցել 1999 թվականի հոկտեմբերի 27-ին տեղի ունեցած ոճրագործության զոհերի հիշատակին։

Ինչպես երևում է ՀՀ վարչապետի հրապարակված տեսանյութում, բարձրաստիճան պաշտոնյաները ծաղիկներ են խանարհել հուշակոթողի մոտ, խոնարհվել ու հեռացել։

Նշենք, որ այսօր «Եռաբլուր» պանթեոն էին այցելել ՀՀ ԱԺ «Քաղաքացիական պայմանակիր» խմբակցության պատգամավոր Անդրանիկ Քոչարյանը և Գագիկ Մելքոնյանը, ԵԿՄ նախագահ Սասուն Միքայելյանը, վարչապետ Վազգեն Սարգսյանի եղբայր Արամ Սարգսյանը և այլք։

Հիշեցնենք, որ 1999թ.-ի հոկտեմբերի 27-ին հանցախումբը` Նաիրի Հունանյանի գլխավորությամբ, ՀՀ ազգային ժողովի նիստերի դահլիճում սպանեց ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին:

Հարուցված քրեական գործի նախաքննությունը տևեց 1.5 տարի, դատավարությունը` 2.5։

2003թ–ին ավարտված դատավարության արդյունքում դատարանը որոշեց Նաիրի Հունանյանին, նրա եղբորը` Կարեն Հունանյանին, նրանց քեռուն` Վռամ Գալստյանին, ինչպես նաև Դերենիկ Բեջանյանին, Էդիկ Գրիգորյանին, Նորայր Եղիազարյանին ու Աշոտ Կնյազյանին դատապարտել ցմահ, Համլետ Ստեփանյանին` 14 տարվա ազատազրկման։

Հանցագործությանը հաջորդած 20 տարվա ընթացքում խմբի 8 անդամներից 4-ը մահացան տարբեր հանգամանքներում։

2019թ–ին` «թավշյա հեղափոխությունից» հետո, «Հոկտեմբերի 27»-ի գործը վերաբացվեց։