ԵՐԵՎԱՆ, 24 հոկտեմբերի – Sputnik. ՌԴ Կուրսկի մարզ ներխուժած ուկրաինական խմբավորումը շրջափակված է, ռուսական զորքերը անցել են դրա ոչնչացմանը։ Այս մասին Ռուսաստանի նախագահ Վլադիմիր Պուտինը հայտարարել է Կազանում ԲՐԻԿՍ-ի գագաթնաժողովից հետո կայացած ասուլիսի ժամանակ։
«Կուրսկի մարզ ներխուժած ուկրաինական բանակը շրջափակված է, արգելափակված։ Մոտ 2 հազար մարդ է։ Փորձ է արվում դրսից ապաշրջափակել խմբավորումը, ներսից ճեղքել։ Առայժմ՝ անհաջող: Ռուսական բանակն անցել է այդ խմբավորման ոչնչացմանը»,- հայտնել է ՌԴ նախագահը։
Պուտինը նշել է, որ ռուսական բանակը վստահորեն գործում է բոլոր ուղղություններով, առաջ է շարժվում մարտական բախման գծի բոլոր հատվածներում:
Հիշեցնենք` ՌԴ ԶՈւ գլխավոր շտաբի պետ Վալերի Գերասիմովը հայտնել էր, որ օգոստոսի 6-ին՝ առավոտյան ժամը 5: 30-ին, Ուկրաինայի զինված ուժերի շուրջ հազար հոգանոց խմբավորումն անցել է հարձակման` նպատակ ունենալով տարածքներ գրավել Կուրսկի մարզում։ Ուկրաինական զինուժի առաջխաղացումը դեպի ՌԴ տարածքի խորքը կասեցվել է։ ՌԴ ԶՈւ գլխավոր շտաբի պետը նշել էր, որ Կուրսկի մարզում գործողությունը կավարտվի, երբ հակառակորդը կջախջախվի, իսկ ռուսական զորքը դուրս կգա ՌԴ պետական սահման։
Ռուսաստանի նախագահ Վլադիմիր Պուտինը, մեկնաբանելով Կուրսկի մարզում տիրող իրավիճակը, հայտարարել է, որ Կիևի ռեժիմը հերթական լայնածավալ սադրանքն է ձեռնարկել, անկանոն կրակոցներ է արձակում, այդ թվում՝ քաղաքացիական թիրախների ուղղությամբ: ՌԴ նախագահը վստահեցրել է, որ հակառակորդն արժանի պատասխան կստանա, Ռուսաստանի զինված ուժերի առջև դրված բոլոր նպատակներին կհասնեն:
Կուրսկի, ինչպես նաև Բելգորոդի և Բրյանսկի մարզերում քաղաքացիների անվտանգությունն ապահովելու համար հակաահաբեկչական գործողության ռեժիմ է սահմանվել։