ԵՐԵՎԱՆ, 24 հոկտեմբերի – Sputnik. ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հանդիպում են անցկացնում ԲՐԻԿՍ գագաթնաժողովի շրջանակում։ Տեղեկությունը հայտնում է ՀՀ կառավարությունը։
«Կազանում ԲՐԻԿՍ–ի 16-րդ գագաթնաժողովի շրջանակում տեղի է ունենում վարչապետ Փաշինյանի հանդիպումն Ալիևի հետ»,– ասված է հաղորդագրությունում։
Կառավարության հրապարակած կադրերում երևում է, որ հանդիպումն ընթանում է ընդլայնված ձևաչափով։ Մասնակցում են փոխվարչապետ Մհեր Գրիգորյանը, Ադրբեջանի փոխվարչապետ Շահին Մուստաֆաևը, ինչպես նաև Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովը:
Փաշինյան–Ալիև հանդիպում
© Photo : press office of the Government of RA
Ավելի վաղ հայտնել էինք, որ Փաշինյանն ու Ալիևը ակտիվ քննարկում են անցկացրել Մավրիտանիայի նախագահի ելույթի ժամանակ։
Հիշեցնենք` ՀՀ վարչապետը մեկօրյա աշխատանքային այցով գտնվում է Կազանում, ուր ժամանել է ՌԴ նախագահ Վլադիմիր Պուտինի հրավերով։ Նա մասնակցում է գագաթնաժողովի վերջին օրվա միջոցառումներին։
ԲՐԻԿՍ երկրների գագաթնաժողովը պետությունների ղեկավարների մասնակցությամբ անցկացվում է Կազանում հոկտեմբերի 22-24-ը: Կազմակերպության նախագահի պաշտոնը 2024 թվականի հունվարի 1-ից զբաղեցնում է Ռուսաստանը` արդարացի գլոբալ զարգացման և անվտանգության համար բազմակողմանիության ամրապնդման կարգախոսի ներքո:
ԲՐԻԿՍ-ը միջպետական միավորում է, որը ստեղծվել է 2006-ին Ռուսաստանի, Չինաստանի, Հնդկաստանի և Բրազիլիայի կողմից, 2011-ին Հարավային Աֆրիկայի Հանրապետությունն է ընդգրկվել կառույցում:
2024 թվականի սկզբից ԲՐԻԿՍ-ին միացել են նաև Եգիպտոսը, Եթովպիան, Իրանը, ԱՄԷ-ն և Սաուդյան Արաբիան։