ԵՐԵՎԱՆ, 22 հոկտեմբերի – Sputnik. Թուրքիան Հայաստանին չի առաջարկել միջնորդ լինել Հայաստանի ու Ադրբեջանի միջև խաղաղության պայմանագրի ուղղությամբ կատարվող աշխատանքն ավարտելու համար։ Այս մասին այսօր ԱԺ–ում լրագրողների հետ զրույցում ասաց ՀՀ Աժ խոսնակ Ալեն Սիմոնյանը։
Նա նշեց, որ Թուրքիայի ներգրավվածությամբ միակ առաջարկը «3+3» հարթակի օգտագործումն է, որը հայկական կողմը կքննարկի ու կարձագանքի։
Նշենք, որ օրեր առաջ Ստամբուլում տեղի ունեցած «3+3» ձևաչափով հանդիպման ժամանակ Երևանին և Բաքվին առաջարկվել է «3+3» հարթակն օգտագործել խաղաղության պայմանագրի ուղղությամբ կատարվող աշխատանքն ավարտելու համար։ Հանդիպմանը մասնակցում են Հայաստանի, Ռուսաստանի, Ադրբեջանի, Իրանի և Թուրքիայի արտգործնախարարները` Արարատ Միրզոյանը, Սերգեյ Լավրովը, Ջեյհուն Բայրամովը, Աբբաս Արաղչին և Հաքան Ֆիդանը։
«Ներգրավվածությունը Թուրքիայի այս պրոցեսի մեջ ակնհայտ է և ցանկությունը նույնպես ակնհայտ է ու բնական է, որ պետք է լիներ ու լինելու է, բայց առաջարկ չի եղել»,– ասաց նա։
Ալեն Սիմոնյանը հավելեց նաև, որ թուրքական կողմի հետ վերջին հանդիպումից հետո իր մոտ տպավորություն է ստեղծվել, թե Թուրքիան նույնպես սպասում է խաղաղության պայմանագրի ստորագրմանը, ու դա, ըստ ՀՀ ԱԺ խոսնակի, լավ նորություն է։
Հիշեցնենք` ավելի վաղ թուրքական լրատվամիջոցները գրել էին, որ Նյու Յորքում Թուրքիայի նախագահ Ռեջեփ Թայիփ Էրդողանի հետ հանդիպման ժամանակ Հայաստանի վարչապետ Նիկոլ Փաշինյանը ցանկություն է հայտնել, որ Թուրքիան օժանդակի Ադրբեջանի հետ խաղաղության հաստատմանը: