ԵՐԵՎԱՆ, 18 հոկտեմբերի – Sputnik. Զինծառայող Աղասի Դալլաքյանին ինքնասպանության հասցնելու մեղադրանքով կալանավորվել են դասակի հրամանատար սպան և համածառայակիցը։ Տեղեկությունը հայտնում է ՀՀ քննչական կոմիտեն։
ՊՆ–ն հոկտեմբերի 13-ին տեղեկացրել էր, որ նույն օրը` ժամը 09:30-ի սահմաններում, հայտնաբերվել է N զորամասի զինծառայող Աղասի Սերոժի Դալլաքյանի դին՝ հրազենային վնասվածքով: Ըստ ՔԿ–ի` վնասվածքը եղել է զինծառայողի կզակի շրջանում։ Աղասի Դալլաքյանը Շիրակի մարզի Բասեն գյուղից էր, տան ավագ զավակը։
Ըստ ՔԿ–ի` իրականացված ծավալուն ապացուցողական և վարութային գործողությունների արդյունքում պարզվել է, որ Աղասի Դալլաքյանը մահացել է ինքնասպանություն գործելու հետևանքով։
«Փաստական տվյալներ են ձեռք բերվել, որ նույն զորամասի դասակի հրամանատար, լեյտենանտը, կոչման բերումով լինելով սերժանտների և զինվորների համար պետ, նույն զորամասի շարքային ժամկետային զինծառայներից մեկի հետ խախտել է մարտական հերթապահություն կրելու կանոնները, զենքով ինքնակամ թողել զորամասի պահպանության տեղամասի կրակային դիրքը և տեղամասի մեկ այլ կրակային դիրքում խմբով՝ միասին, նվաստացրել են մարտական հերթապահության ընդգրկված, նույն զորամասի զինծառայող Աղասի Դալլաքյանի պատիվն ու արժանապատվությունը»,– ասված է հաղորդագրությունում:
Գտնվելով անելանելի վիճակում՝ նշված օրը, նույն կրակային դիրքում դիտորդի պարտականությունները կատարելու ընթացքում, վերջինս իրեն ամրակցված «AKM» տեսակի ինքնաձիգով մեկ կրակոց է արձակել կզակի շրջանում և ինքնասպան եղել
Դասակի հրամանատարին և շարքային մեղադրանք է ներկայացվել ՀՀ քրեական օրենսգրքի 540-րդ հոդվածի (մարտական հերթապահություն կամ մարտական ծառայություն կրելու կանոնները խախտելը, որը կատարվել է մի խումբ անձանց կողմից, սպայական կազմի զինծառայողի կողմից, զենքով) 2-րդ մասի 1-ին, 2-րդ և 3-րդ կետերով, 522-րդ հոդվածի (զինծառայողին անզգուշությամբ ինքնասպանության հասցնելը, որը կատարվել է մի խումբ անձանց կողմից, հրամանատարի կողմից ստորադասի նկատմամբ, մարտական հերթապահության ժամանակ) 2-րդ մասի 1-ին, 2-րդ և 3-րդ կետերով, իսկ շարքային ժամկետային զինծառայողին՝ ՀՀ քրեական օրենսգրքի 540-րդ հոդվածի 2-րդ մասի 1-ին և 3-րդ կետերով (մարտական հերթապահություն կամ մարտական ծառայություն կրելու կանոնները խախտելը, որը կատարվել է մի խումբ անձանց կողմից և զենքով), 522-րդ հոդվածի 2-րդ մասի 1-ին և 3-րդ կետերով (Զինծառայողին անզգուշությամբ ինքնասպանության հասցնելը, որը կատարվել է մի խումբ անձանց կողմից, մարտական հերթապահության ժամանակ)։
Նախաքննությունը շարունակվում է, անհրաժեշտ գործողություններ են իրականացվում դեպքի բոլոր հանգամանքները, հնարավոր այլ անձանց առնչությունը պարզելու համար։