ԵՐԵՎԱՆ, 18 հոկտեմբերի - Sputnik. Ռուսաստանը ոչ մի պարագայում թույլ չի տա Ուկրաինայում միջուկային զենքի ստեղծում: Այս մասին հայտարարել է ՌԴ նախագահ Վլադիմիր Պուտինը ԲՐԻԿՍ-ի մասնակից երկրների առաջատար ԶԼՄ-ների ղեկավարների հետ հանդիպման ժամանակ:
«Կարող եմ միանգամից ասել, որ Ռուսաստանը դա (Ուկրաինայում միջուկային զենքի ստեղծումը, - խմբ.) թույլ չի տա ոչ մի պարագայում», - ասել է Պուտինը:
Տեղեկություններն այն մասին, որ Ուկրաինան կարող է միջուկային զենք ունենալ, ՌԴ նախագահը սադրանք է անվանել:
Ավելի վաղ Վլադիմիր Զելենսկին Բրյուսելում ԵՄ պետությունների ղեկավարների գագաթնաժողովի ընթացքում կոչ էր արել շուտափույթ ՆԱՏՕ հրավիրել Ուկրաինային: Քաղաքական գործիչն ընդգծել է, որ հակառակ դեպքում իր երկրին կմնա միայն միջուկային վերազինումը։ Միևնույն ժամանակ գերմանական Bild թերթը, հղում կատարելով ուկրաինացի պաշտոնյայի, որը չի ցանկացել հրապարակել իր անունը, հայտնել է, որ Ուկրաինան մի քանի շաբաթվա ընթացքում կարող է միջուկային զենք ստեղծել Ռուսաստանի զինված ուժերի դեմ օգտագործելու համար:
ՌԴ նախագահն այսօր հանդիպում է անցկացնում ԲՐԻԿՍ-ի մասնակից երկրների առաջատար ԶԼՄ-ների ղեկավարների հետ: Միջոցառմանը Ռուսաստանը ներկայացնում է «Ռոսիա սեգոդնյա» մեդիախմբի գլխավոր տնօրեն Դմիտրի Կիսելյովը: