ԵՐԵՎԱՆ, 15 հոկտեմբերի - Sputnik. Իրանը դադարեցնում է բոլոր թռիչքները դեպի Եվրոպա «Iran Air» պետական ավիաընկերության դեմ ԵՄ նոր պատժամիջոցներից հետո: Իրանական լրատվամիջոցների փոխանցմամբ՝ այս մասին հայտնել է Իրանի ավիափոխադրողների ասոցիացիայի ղեկավար Մաքսուդ Էսաադի Սամանին:
Իրանի դեմ ԵՄ նոր սահմանափակումների հայտարարումից մի քանի ժամ անց իրանական փոխադրողն ուղևորներին հաղորդագրություններ է ուղարկել դեպի Եվրոպա բոլոր չվերթերը չեղարկելու մասին: Նշվում է, որ դա կապված է Բրյուսելի որոշման հետ։
Նշենք, որ հոկտեմբերի 14-ին Եվրամիության պատժամիջոցների նոր ցուցակում ավելացվել են իրանական երեք ավիաընկերություններ՝ «Iran Air», «Mahan» և «Saha»։
Ավելի վաղ հայտնի էր դարձել, որ ԵՄ-ն Իրանի դեմ նոր պատժամիջոցներ կսահմանի Ռուսաստանին իբր բալիստիկ հրթիռների մատակարարման պատճառով: Համապատասխան որոշումն ընդունվել է Լյուքսեմբուրգում ԵՄ երկրների ԱԳ նախարարների խորհրդակցության արդյունքում:
Նշենք, որ թվարկված ավիաընկերություններից միայն «Iran Air»-ն էր, որ թռիչքներ էր իրականացնում դեպի եվրոպական երկրներ։ Իրանական ավիափոխադրողների ասոցիացիայի ղեկավարի խոսքով՝ տարածաշրջանի իրավիճակից ելնելով՝ որոշ արտասահմանյան ավիաընկերություններ սահմանափակել են իրենց թռիչքները դեպի Իրան։ Հետևաբար, այս իրավիճակում եվրոպական թռիչքների մի մասն այսուհետ կիրականացվի տարանցիկ երկրի միջոցով։