ԵՐԵՎԱՆ, 14 հոկտեմբերի – Sputnik. Ֆրանսիայի նախագահ Էմանուել Մակրոնը Իրանի նախագահ Մասուդ Փեզեշքիանի հետ բանակցություններում Թեհրանին կոչ է արել նպաստել տարածաշրջանի ապաէսկալացմանը։ Տեղեկությունը հայտնում է «France Press» գործակալությունը՝ հղում անելով Ելիսեյան պալատին:
«Մակրոնն ընդգծել է ընդհանուր ապաէսկալացիային աջակցելու գործում Իրանի պատասխանատվությունը և կոչ է արել օգտագործել իր ազդեցությունը ապակայունացնող խաղացողների վրա, որոնք օգտվում են նրա աջակցությունից»,-ասված է տեքստում:
Իրանի առաջնորդի վարչակազմից իրենց հերթին հայտարարել են, որ զրույցի ընթացքում Փեզեշքիանն ու Մակրոնը քննարկել են, թե ինչպես են երաշխավորելու հրադադարը Լիբանանի շիական «Հզբոլլահ» շարժման և իսրայելական կողմի միջև:
Նշվում է, որ Իրանի նախագահը Մակրոնին խնդրել է համագործակցել եվրոպական այլ երկրների հետ, որպեսզի ստիպի Իսրայելին վերջ դնել Գազայում ու Լիբանանում կատարվող ցեղասպանությանը և հանցագործություններին:
Իսրայելը հոկտեմբերի 1-ից Լիբանանի հարավում ցամաքային գործողություն է իրականացնում «Հզբոլլահի» ուժերի դեմ և շարունակում է հարևան երկրի օդային ռմբակոծությունները, այնտեղ արդեն ավելի քան 2 հազար մարդ է զոհվել, ավելի քան մեկ միլիոն մարդ դարձել է փախստական: Չնայած կորուստներին, այդ թվում՝ հրամանատարական կազմում, «Հզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:
Իսրայելը նշում է, որ ռազմական արշավի գլխավոր նպատակն է պայմաններ ստեղծել հյուսիսի 60 հազար բնակիչների վերադարձի համար, որոնք մեկ տարի առաջ տարհանվել են «Հզբոլլահի» կողմից պաղեստինյան ՀԱՄԱՍ շարժմանն աջակցելու համար սկսված գնդակոծությունների պատճառով:
Իրանը հոկտեմբերի 1-ին պատմության մեջ երկրորդ անգամ զանգվածային հրթիռակոծության ենթարկեց Իսրայելը՝ դա անվանելով ինքնապաշտպանության գործողություն: Իսրայելցի զինվորականները հայտարարում են, որ արձակվել է մոտ 180 բալիստիկ հրթիռ, որոնց մեծ մասը հաջողվել է որսալ: Իսրայելի իշխանությունների տվյալներով՝ գնդակոծության հետևանքով քաղաքացիների թվում զոհեր չկան։ Մի շարք լրատվամիջոցներ հաղորդել են Հորդանան գետի արևմտյան ափին մեկ մարդու մահվան մասին, որը ենթադրաբար պաղեստինցի է եղել (Գազայի հատվածից):
Իրանցիները պնդում են, որ հրթիռները խոցել են Իսրայելի ռազմական օբյեկտները, իսրայելցիները վստահեցնում են, որ նվազագույն վնաս է հասցվել։ Նրանք խոստանում են պատասխան հարված հասցնել, իսկ ԱՄՆ-ն՝ օգնության հասնել իր գլխավոր մերձավորարևելյան դաշնակցին։ ՌԴ ԱԳՆ պաշտոնական ներկայացուցիչ Մարիա Զախարովան Իրանի հրթիռային հարվածից հետո հայտարարել է, որ ԱՄՆ նախագահ Ջո Բայդենի վարչակազմը ձախողվել է Մերձավոր Արևելքում՝ լիակատար անօգնականություն ցուցաբերելով ճգնաժամերի լուծման հարցում: