ԵՐԵՎԱՆ, 13 հոկտեմբերի - Sputnik. Անկարայի «զիգզագները» ԱՄՆ-ի, Ռուսաստանի և Չինաստանի հետ հարաբերություններում լուրջ կասկածներ են առաջացնում ԲՐԻԿՍ-ի անդամ երկրների մոտ։ Այս մասին, ինչպես հաղորդում է ՌԻԱ Նովոստին, գրում է Aydınlık թերթը։
Լրատվամիջոցն ընդգծում է, որ Թուրքիան կարող է ԲՐԻԿՍ-ի և ՇՀԿ-ի հետ իր կապերը որպես լծակ օգտագործել Արևմուտքի հետ հարաբերությունները վերանայելու համար:
Ավելի վաղ ՌԴ նախագահի օգնական Յուրի Ուշակովը հաստատել էր, որ Թուրքիան ներկայացրել է ԲՐԻԿՍ-ին լիիրավ անդամակցության հայտ: Թուրքիայի նախագահ Ռեջեփ Թայիփ Էրդողանը կմասնակցի հոկտեմբերի 22-24-ին Կազանում կայանալիք ԲՐԻԿՍ-ի գագաթնաժողովին:
Թերթը հանդես է գալիս հարցադրմամբ, թե ինչ է պետք Անկարային ԲՐԻԿՍ-ից, մի կազմակերպությունից, որը ձգտում է այլընտրանքային աշխարհակարգի ստեղծմանը։ Կդառնա՞ արդյոք Թուրքիան այդ նոր կարգն առաջ մղող երկրներից մեկը, թե կշարունակի՞ ԲՐԻԿՍ-ի և ՇՀԿ-ի նման կառույցներն օգտագործել որպես հաղթաթուղթ Արևմուտքի հետ բանակցություններում։
Այս հարցի շուրջ Անկարայի հայտարարությունները ոչ միանշանակ են։ Էրդողանն ավելի վաղ նշել էր, որ ԲՐԻԿՍ-ին և ԱՍԵԱՆ-ին (Հարավարևելյան Ասիայի պետությունների ասուցացիա) մասնակցությունը նոր հնարավորություններ է բացում Թուրքիայի համար, հատկապես տնտեսական ոլորտում, բայց միևնույն ժամանակ ընդգծել էր, որ դա չի նշանակում հրաժարվել ՆԱՏՕ-ից: Միևնույն ժամանակ Թուրքիայի արտգործնախարար Հաքան Ֆիդանը հայտարարել էր, որ եթե Թուրքիային ընդունեին ԵՄ, ապա նա համագործակցություն չէր փնտրի ԲՐԻԿՍ-ի հետ: Նման հակասական ազդանշաններն ուժեղացնում են ԲՐԻԿՍ-ի անդամ երկրների կասկածները։ Այնուամենայնիվ, ինչպես նշում է Aydınlık-ը, ԲՐԻԿՍ-ի երկրները դժվար թե ցանկանան Թուրքիային մղել դեպի Արևմուտք։
2024 թվականի հունվարի 1-ից Ռուսաստանը նախագահում է ԲՐԻԿՍ-ում։ Այս տարի կազմակերպությանը միացել են Եգիպտոսը, Եթովպիան, Իրանը, ԱՄԷ-ն և Սաուդյան Արաբիան: ԲՐԻԿՍ-ի գագաթնաժողովը, որը տեղի կունենա հոկտեմբերի 22-24-ը Կազանում, կդառնա Ռուսաստանում երբևէ անցկացված ամենամեծ արտաքին քաղաքական իրադարձությունը:
Յուրի Ուշակովի խոսքով՝ այս պահին ԲՐԻԿՍ-ի հետ համագործակցելու հետաքրքրություն են հայտնել 34 երկրներ, ինչն ընդգծում է առաջիկա գագաթնաժողովի նշանակությունը գլոբալ քաղաքականության տեսակետից: Ռուսաստանն իր նախագահությունն անցկացնում է հանուն արդարացի համաշխարհային զարգացման և անվտանգության բազմակողմանիության ամրապնդման կարգախոսի ներքո՝ կազմակերպելով ավելի քան 200 քաղաքական, տնտեսական և հասարակական միջոցառումներ: