ԵՐԵՎԱՆ, 11 հոկտեմբերի – Sputnik. Արցախից բռնի տեղահանված 3431 անձ, հոկտեմբերի 10-ի դրությամբ, ստացել է ՀՀ քաղաքացիություն։ Այս մասին Լոռիում ընթացող քննարկման ժամանակ ասաց ՀՀ ՆԳՆ Միգրացիայի և քաղաքացիության ծառայության պետի տեղակալ Մարիամ Գևորգյանը։
«ՀՀ քաղաքացիություն ստանալու համար, հոկտեմբերի 10-ի տվյալներով, դիմել է 5409 անձ։ ՀՀ նախագահի հրամանագրով՝ 3431 անձի (Արցախից բռնի տեղահանված, – խմբ.) շնորհվել է ՀՀ քաղաքացիություն»,– նշեց Գևորգյանը։
Նշենք, որ սեպտեմբերի 26-ի դրությամբ՝ ՀՀ քաղաքացիություն ստանալու համար դիմել էր 4918 անձ, նրանցից 3226 անձ ստացել էր ՀՀ քաղաքացիություն։
Այսինքն՝ վերջին երկու շաբաթում դիմումների թիվն ավելացել է 491-ով, ՀՀ քաղաքացիություն ստացածների թիվը՝ 203-ով։
Ոլորտի պատասխանատուները նշում են՝ սկզբնական շրջանում ՀՀ քաղաքացիության համար դիմելիությունը բավականին ցածր էր՝ օրական 5-10-ը։
Կառավարության կողմից բնակարանային ապահովման ծրագրի մշակումից հետո դիմելիությունը բարձրացել է՝ օրական միջինը 50-80 դիմում է ստացվում։
Հիշեցնենք, որ ծրագրին մասնակցելու համար պարտադիր պահանջ է ՀՀ քաղաքացիություն ունենալը։
Ըստ ՀՀ կառավարության հաստատած ծրագրի` պոտենցիալ շահառուները նախնական հաշվարկով 25 000 ընտանիքներ են։ Վերջնական թիվը պետք է ճշգրտվի ծրագրի իրականացման ընթացքում` ըստ ստացված դիմումների քանակի։
Ծրագրի շահառու դառնալու համար արցախցիները պետք է հայտ ներկայացնեն, որից հետո շահառու ընտանիքին պետք է հատկացվի բնակարանի գնման հավաստագիր` ընտանիքի յուրաքանչյուր անձի հաշվով` 3-5 մլն դրամի չափով` կախված բնակարանի կամ տան գտնվելու տարածքում գույքի շուկայական արժեքից։