ԵՐԵՎԱՆ, 10 հոկտեմբերի – Sputnik. Ռուսական առաջատար բուհերն իրենց կրթական ծրագրերը ներկայացնում են Գյումրիում։ Հոկտեմբերի 10-11-ը հանրապետության երկրորդ քաղաքում առաջին անգամ անցկացվում է ռուսական բուհերի «Կրթությունը Ռուսաստանում. Գյումրի-2024» կրթական ցուցահանդեսը։ Այն կազմակերպել է Հայաստանում «Ռոսսոտրուդնիչեստվո»-ի ներկայացուցչության, ՀՀ կրթության, գիտության, մշակույթի և սպորտի նախարարության և Գյումրու քաղաքապետարանի աջակցությամբ:
Ցուցահանդեսի բացմանը ներկա ՀՀ-ում ՌԴ արտակարգ և լիազոր դեսպան Սերգեյ Կոպիրկինն ընդգծեց՝ կրթական ոլորտում համագործակցության բավականին դինամիկ զարգացում կա մեր երկու երկրների միջև։
«Ունենք շուրջ 5000 հայաստանցի ուսանողներ, որոնք սովորում են ՌԴ-ում, այդ թվում՝ անվճար հիմունքներով, ՌԴ կառավարության միջոցներով։ Ի դեպ, Ռուսաստանի կառավարության տրամադրած քվոտաներն անվճար կրթության համար ամեն տարի ավելանում են»,- ասաց դեսպանը։
Նա հիշեցրեց՝ ավելի քան 5000 ուսանողներ էլ սովորում են այստեղ՝ Հայաստանում՝ Ռուս-հայկական համալսարանում, ռուսական բուհերի հայաստանյան մասնաճյուղերում։
Այսօր և վաղը Գյումրիում ՌԴ առաջատար համալսարանները ներկայացնում են իրենց ուսումնական ծրագրերն ու գիտական նախագծերը՝ բացառիկ հնարավորություն ընձեռելով ծանոթանալու լավագույն կրթական նախաձեռնություններին: Կրթական ցուցահանդեսի մասնակիցները նաև հնարավորություն ունեն ծանոթանալու «Ռոսսոտրուդնիչեստվո»-ի՝ արտասահմանցի ուսանողների համար անվճար կրթության ծրագրին։
Ցուցահանդեսին մասնակցում են ՌԴ տնտեսական զարգացման նախարարության Արտաքին առևտրի համառուսաստանյան ակադեմիան, «Տնտեսագիտության բարձրագույն դպրոց» ազգային հետազոտական համալսարանը, Մոսկվայի ֆիզիկատեխնիկական ինստիտուտը, Հյուսիսային Կովկասի դաշնային համալսարանը, Մ. Ի. Պլատովի անվան Հարավային Ռուսաստանի պետական պոլիտեխնիկական համալսարանը և այլ բուհեր։
Ավելի վաղ «Ռոսսոտրուդնիչեստվո»-ի հայաստանյան ներկայացուցչությունը, Sputnik Արմենիայի մուլտիմեդիոն կենտրոնում մամուլի ասուլիսի ժամանակ հայտնել էր, որ Հայաստանից երկու հարյուր ութսուն դիմորդ 2025-2026 ուսումնական տարում կարող է անվճար կրթություն ստանալ Ռուսաստանում։