ԵՐԵՎԱՆ, 10 հոկտեմբերի – Sputnik. Աշխարհահռչակ օպերային երգիչ, տենոր Պլասիդո Դոմինգոն հիացած է երևանյան համերգով և անհամբերությամբ սպասում է իր հաջորդ այցին։ Համերգից հետո նա այս մասին ասել է Երևանի քաղաքապետարանի մամուլի ծառայությանը։
«Թատրոնը հիասքանչ է։ 14 տարի առաջ, երբ այստեղ էի, երգում էի ֆուտբոլի ստադիոնում (դոմինգոն 2010թ–ին Երևանում ելույթ է ունեցել Կ. Դեմիրճյանի անվան մարզահամերգային համալիրում,–խմբ.)։ Իմ որդին` Պլասիդո Դոմինգո կրտսերը նույնպես այստեղ երգել է։ Երեկ ինձ ասում էր` դու երգել ես ֆուտբոլի ստադիոնում, իսկ ես երգել եմ հիանալի թատրոնի բեմում, որտեղ դու վաղն ես երգելու։ Այսօր ես էլ դա արեցի, ինչպես իմ որդին։ Ես նույնպես տեսա այս թատրոնը` մեծ դիրիժորի ղեկավարությամբ»,– նշել է աշխարհահռչակ օպերային երգիչը։
Նա ընդգծել է, որ անչափ ուրախ է ու հպարտ, որ արժանացել է Երևանի քաղաքապետի ոսկե մեդալի, որը շնորհվել է Երևան քաղաքի մշակութային կյանքի զարգացման գործում ներդրած նշանակալի ավանդի համար։
Նշենք, որ Դոմինգոն նաև գրառում է կատարել հիշողությունների գրքում։
«Հրաշալի էր Երևանի միջազգային երաժշտական փառատոնի շրջանակում երգել Արամ Խաչատրյանի անվան համերգասրահում, որն ուղեկցվում էր մաեստրո Էդուարդ Թոփչյանի ղեկավարած հրաշալի նվագախմբի և երիտասարդ ու հզոր սոպրանո Ջուլիանա Գրիգորյանի հետ: Անհամբեր սպասում եմ իմ երրորդ ուղևորությանը Երևան»,– հիշողությունների գրքում գրել է Դոմինգոն։
Հիշեցնենք, որ աշխարհահռչակ տենոր Պլասիդո Դոմինգոյի երևանյան համերգը կայացել է հոկտեմբերի 8–ին։
Համերգին հնչել են նաև արիաներ, դուետներ և նախերգանքներ հայտնի օպերաներից, սարսուելաներից, ինչպես նաև սիրված համաշխարհային մեղեդիներ: Դոմինգոն և օպերային երգչուհի Ջուլիանա Գրիգորյանը համերգային ծրագրի ընթացքում երգել են նաև «Էրեբունի–Երևան» երգը։