ԵՐԵՎԱՆ, 9 հոկտեմբերի – Sputnik. Ռուսական զորքերի «Հյուսիս» խմբավորումն ազատագրել է Կուրսկի մարզի Նովայա Սորոչինա և Պոկրովսկի բնակավայրերը: Տեղեկությունը հայտնում է Ռուսաստանի պաշտպանության նախարարությունը։
««Հյուսիս» զորքերի խմբավորման ստորաբաժանումները շարունակել են հարձակողական գործողությունների իրականացումը, որոնց ընթացքում ազատագրել են Նովայա Սորոչինա և Պոկրովսկի բնակավայրերը», - ասվում է հաղորդագրության մեջ:
Բացի այդ, «Հյուսիս» խմբավորման մարտիկները Դարյինոյի, Լյուբիմովկայի, Նովի Պուտի և Պլեխովոյի հատվածներում պարտության են մատնել ուկրաինական տասը բրիգադների կազմավորումներին։ Նրանք նաև երկու հարձակում են հետ մղել Լյուբիմովկա և Պլեխովո բնակավայրերի ուղղությամբ, ինչի արդյունքում Ուկրաինայի զինված ուժերը շուրջ 20 մարդ են կորցրել (սպանված և վիրավոր)։
Հիշեցնենք` ՌԴ ԶՈւ գլխավոր շտաբի պետ Վալերի Գերասիմովը հայտնել էր, որ օգոստոսի 6-ին՝ առավոտյան ժամը 5: 30-ին, Ուկրաինայի զինված ուժերի շուրջ հազար հոգանոց խմբավորումն անցել է հարձակման` նպատակ ունենալով տարածքներ գրավել Կուրսկի մարզում։ Ուկրաինական զինուժի առաջխաղացումը դեպի ՌԴ տարածքի խորքը կասեցվել է։ ՌԴ ԶՈւ գլխավոր շտաբի պետը նշել էր, որ Կուրսկի մարզում գործողությունը կավարտվի, երբ հակառակորդը կկջախջախվի, իսկ ռուսական զորքը դուրս կգա ՌԴ պետական սահման։
Ռուսաստանի նախագահ Վլադիմիր Պուտինը, մեկնաբանելով Կուրսկի մարզում տիրող իրավիճակը, հայտարարել է, որ Կիևի ռեժիմը հերթական լայնածավալ սադրանքն է ձեռնարկել, անկանոն կրակոցներ է արձակում, այդ թվում՝ քաղաքացիական թիրախների ուղղությամբ: ՌԴ նախագահը վստահեցրել է, որ հակառակորդն արժանի պատասխան կստանա, Ռուսաստանի զինված ուժերի առջև դրված բոլոր նպատակներին կհասնեն:
Կուրսկի, ինչպես նաև Բելգորոդի և Բրյանսկի մարզերում քաղաքացիների անվտանգությունն ապահովելու համար հակաահաբեկչական գործողության ռեժիմ է սահմանվել։