ԵՐԵՎԱՆ, 7 հոկտեմբերի – Sputnik. «Սուրմալու» առևտրի կենտրոնի հարակից տարածքում մետրոյի նոր կայարանի կառուցման նպատակով հնարավոր է առաջիկայում նախագծի մրցույթ հայտարարվի։ Այս մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետի խորհրդական Անետա Բաբայանը։
«Մետրոյի կայարանի կառուցման նախագծի աշխատանքները ձեռք բերելու համար տեխնիկական առաջադրանքն ուղարկվել է մասնագիտական խմբի անդամներին` ուսումնասիրության։ Այդ խումբը, եթե հաստատի, ապա առաջիկայում մենք կկարողանանք հայտարարել նախագծային աշխատանքների ձեռքբերման մրցույթը։ Ենթադրում եմ, որ մինչև ամսվա վերջ կլինի, եթե ներքին գործընթացներն ապահովվեն»,– նշեց Բաբայանը։
Խոսելով մետրոյի «Աջափնյակ» կայարանի մասին` նա ընդգծեց, որ նախագծման աշխատանքներ իրականացնող ռուսական «Մետրոգիպրոտրանս» ՍՊԸ–ն հոկտեմբերի 1-ին արդեն ամբողջությամբ մուտք է արել վերամշակված նախագծանախահաշվային փաստաթղթերի փաթեթը։ Ներկայում դրանք ուսումնասիրվում են, և այս շաբաթ հնարավոր է, որ մասնագիտական խմբի նիստի կլինի, որի օրակարգում դրված է փաթեթն ընդունելու և երկրորդ անգամ պարզ փորձաքննության ներկայացնելու հարցը։