ԵՐԵՎԱՆ, 7 հոկտեմբերի – Sputnik. Երևանի Իսակովի պողոտայում գտնվող «Դոմուս» հիպերմարկետը ՀՀ քաղաքաշինության, տեխնիկական և հրդեհային անվտանգության տեսչական մարմնից ավարտական ակտ չի ունեցել։ Այս մասին Sputnik Արմենիային ասաց ՔՏՀԱ տեսչական մարմին մամուլի խոսնակ Ելենա Զոհրաբյանը։
Ավելի վաղ ՔՏՀԱ–ից հայտնել էին նաև, որ Երևանի Իսակովի պողոտայում գտնվող «Դոմուս» հիպերմարկետում վերահսկողական գործառույթ չեն իրականացրել։
«Ընդհանուր «Դեկորա գրուպ» ընկերությունը, այդ թվում «Դոմուսի» այս մասնաճյուղն ավարտական ակտ չունեն։ Նախկինում այլ նշանակությամբ գործող այս շենքն արդեն իսկ ունեցել է պետական գրանցում (նման գրանցում է անում Կադաստրի կոմիտեն), այդ պատճառով էլ ՏՄ չեն դիմել ավարտական ակտի համար»,– նշեց Զոհրաբյանը։
Նշենք, որ ՔՏՀԱ–ն վերահսկողական գործառույթներն ընթացիկ տարվա 3 եռամսյակում իրականացրել է հրդեհապայթյունավտանգ օբյեկտներում` խոշոր նավթամթերքի պահեստարաններում, գազաբենզալցակայաններում, ինչպես նաև խոշոր առևտրի կենտրոններում (օրինակ` «Փեթակ», «Սուրմալու»)։ 4–րդ եռամսյակում նախատեսված է ստուգումներ անցկացնել այլ կառույցներում։
Հիշեցնենք, որ հրդեհի մասին ահազանգը ՆԳՆ Փրկարար ծառայությունում ստացվել է հոկտեմբերի 7-ին, ժամը 12։57-ին։ Հայտարարվել է հրդեհի բարդության «Թիվ 3» կանչ։ Հրդեհը տարածվել է ոչ միայն «Դոմուսի» պահեստի հատվածում, այլև խանութի։ Այրվել է կահույք, տեխնիկա, շինանյութ։