ԵՐԵՎԱՆ, 3 հոկտեմբերի - Sputnik. Երևանում անցկացվելիք WCIT-2024 տեղեկատվական տեխնոլոգիաների համաշխարհային համագումարին (WCIT) կմասնակցեն աշխարհի խոշորագույն ընկերություններ: Այս մասին համագումարի կազմկոմիտեի ղեկավար Հայկ Կարապետյանն ասաց մամուլի ասուլիսի ժամանակ։
Կարապետյանը նշեց, որ համագումարի հիմնական թեման կլինի արհեստական բանականությունը: NVIDIA-ի ներկայացուցիչը, օրինակ, կպատմի արհեստական բանականության ոլորտում կատարված հեղափոխության մեջ իրենց չիպերի դերի մասին: Ամերիկահայ հայտնի միլիարդատեր Նուբար Աֆեյանը կպատմի բժշկական ոլորտում արհեստական բանականության կիրառման մասին։
Ներկայացված կլինեն նաև TikTok-ը, Synopsis-ը, Microsoft-ը և այլ ընկերություններ:
«Պանելային քննարկմանը կմասնակցի ՀՀ առողջապահության նախարարը։ ԿԲ ներկայացուցիչը կանդրադառնա այնպիսի թեմաների, ինչպիսիք են կիբեռանվտանգությունը և էլեկտրոնային կառավարումը: Կլինի պանելային քննարկում արհեստական բանականության օգտագործման հետ կապված ֆուտուրիստական փոփոխությունների, մարկետինգում դրա դերի մասին»,-նշել է Կարապետյանը։
Իր հերթին Հայաստանի Առաջատար տեխնոլոգիաների ձեռնարկությունների միության (UITE) նախագահ Ալեքսանդր Եսայանը տեղեկացրեց, որ ժամանելու են Ռոդրիգո Մեսսին (աշխարհահռչակ ֆուտբոլիստ Լեո Մեսսիի եղբայրն ու մենեջմենթի գծով տնօրենը) և խոշոր վենչուրային հիմնադրամների ներկայացուցիչներ: Հնարավոր է, որ տեսակապի միջոցով համագումարի մասնակիցներին ողջույնի խոսքով դիմի նաև ամերիկացի գործարար Իլոն Մասկը:
Համագումարը տեղի կունենա հոկտեմբերի 5-7-ը Երևանի Կարեն Դեմրիճյանի անվան մարզահամերգային համալիրում: Այցելելու համար հարկավոր է տոմս ձեռք բերել:
Զուգահեռաբար հոկտեմբերի 4-7-ը «Մերիդիան» Էքսպոկենտրոնում կանցկացվի նաև DigiTec բարձր տեխնոլոգիաների ամենամյա ցուցահանդեսը: Մուտքն ազատ է։