ԵՐԵՎԱՆ, 1 հոկտեմբերի – Sputnik. Սանահին գյուղը կառանձնացվի Ալավերդի բնակավայրից որպես պատմամշակութային ինքնուրույն և կոլորիտ ունեցող բնակավայր Ալավերդի համայնքում և այդպես հնարավոր կլինի ավելի արագ զարգացնել պատմամշակութային այդ բնակավայրը։ Կառավարության այս առաջարկը Ազգային ժողովում ներկայացրեց ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը։
Փոխնախարարը նշեց, որ Սանահինը 1996 թվականից Ալավերդի համայնքի թաղամաս է։ Իսկ առանձին բնակավայր դարձնելը հիմնականում պայմանավորված է այն հանգամանքով, որ Սանահինը ՀՀ պատմական, թերևս, ամենահին գյուղերից և բնակավայրերի մեկն է։
«Վերջին տարիներին Լոռին և Լոռու ուղղությունը դարձել է զբոսաշրջային մեր ամենահետաքրքիր ուղղություններից մեկը, իսկ Սանահինը, հատկապես այդ ուղղության անկյունաքարային բնակավայերից և գյուղերից մեկն է։ Նա ունի պատմական միջավայր, Հաղպատի հետ միասին վանական համալիրն ընդգրկված է ՅՈւՆԵՍԿՕ–ի պատմամշակութային համատեքստում, և մենք համոզված ենք, որ Սանահին գյուղը առանձնացնելով որպես պատմամշակութային և կոլորիտ ունեցող բնակավայր` հնարավոր կլինի այն ավելի արագ և էֆեկտիվ զարգացնել»,–ասաց Տերտերյանը։
Բացի դա ,գաղտնիք չէ, որ Սանահինը առանձին բուկլետներում, տուրիստական ուղեցույցներում արձանագրվում է որպես առանձին գյուղ։ Նաև Սանահինը 273 տնտեսություն ունեցող և 200 մշտական բնակվող տնտեսություն ունեցող գյուղ է, աշխարհագրորեն էլ Ալավերդի քաղաքից որոշակի առնանձնացվածություն ունի։
Հարակից զեկուցող, «Քաղաքացիական պայմանագիր» կուսակցության պատգամավոր Արեն Մկրտչյանը հավելեց, որ Սանահինը չունի վարչական ղեկավար և օպերատոր, և բնակիչները ստիպված են հասարակ տեղեկանքի համար գնալ, հասնել Ալավերդու համայնքապետարան։
«Առանձին գյուղական բնակավայրի կարգավիճակ տալու պարագայում գյուղը վարչական շենք ու վարչական ղեկավար կունենա»,–հավելեց նա։
Միևնույն ժամանակ Մկրտչյանը հավելեց, որ այս պահին Սանահինը առանձին ֆինանսավորում չի ստանում, սակայն որպես տուրիստական ուղղություն շատ կարևոր է և փոփոխությունով կկարգավորվի նաև այդ հարցը։