ԵՐԵՎԱՆ, 1 հոկտեմբերի - Sputnik. Եվրասիական տնտեսական միության անդամ պետությունների վարչապետները Երևանում են՝ մասնակցելու Եվրասիական միջկառավարական խորհրդի նիստին: Այսօր առավոտյան նրանց դիմավորել է ՀՀ վարչապետ Նիկոլ Փաշինյանը։ Նիստին մասնակցում է նաև Իրանի փոխնախագահ Մոհամմադ Ռեզա Արեֆը: Ինչպես հայտնի է, անցած տարվա դեկտեմբերին ԵԱՏՄ-ի և Իրանի միջև ստորագրվեց ազատ առևտրի գոտու մասին համաձայնագիր:
«Հնգյակի» պետությունների վարչապետները կքննարկեն միության շրջանակներում տնտեսական համագործակցության հարցերի լայն շրջանակ: Նիստի օրակարգում ընդգրկված է 20 հարց, որից 5-ը կքննարկվեն նեղ կազմով: Մասնավորապես, կողմերը կքննարկեն արդյունաբերական համագործակցության հիմնական ուղղությունները մինչև 2030 թվականը, ապրանքների բորսային շուկայի ձևավորման հայեցակարգն ու տեղեկատվության փոխանակման կանոնները:
Հատուկ ուշադրություն է դարձվելու ներքին շուկայի գործունեության, արդյունաբերական, տրանսպորտային, մաքսասակագնային, գյուղատնտեսական և էներգետիկ ոլորտներում փոխգործակցության զարգացման հարցերին: Միջկառավարական խորհրդի շրջանակներում նախատեսված են նաև մի շարք երկկողմ հանդիպումներ։
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանն ու Ղրղզստանը: