ԵՐԵՎԱՆ, 29 սեպտեմբերի – Sputnik. Սուրբ պատարագը դեռ չավարտված՝ ՀՀ վարչապետ Նիկոլ Փաշինյանը, ՀՀ նախագահ Վահագն Խաչատուրյանը, ԱԺ նախագահ Ալեն Սիմոնյանը` բարձրաստիճան այլ պաշտոնյաների հետ լքեցին Մայր տաճարը։ Ամենայն հայոց կաթողիկոսը դեռ չի ավարտել պատարագը։
Պաշտոնյաները լքեցին Մայր տաճարն այն պահին, երբ կաթողիկոսը պատրաստվում էր իջնել բեմից ու հնարավորություն տար ներկա գտնվողներին համբուրել Սուրբ խաչը ու ստանալ հայրապետական օրհնություն։
Հեռանալիս Նիկոլ Փաշինյանը չցանկացավ պատասխանել լրագրողների հարցերին։
Հիշեցնենք, որ Հայ առաքելական եկեղեցու և Նիկոլ Փաշինյանի իշխանության միջև առկա տարաձայնությունների մասին սկսեցին խոսել 2018 թվականից` նրա իշխանության գալուց անմիջապես հետո: Այս ընթացքում անգամ քաղաքացիական շարժում սկսվեց Գարեգին 2–րդի դեմ։ 2020 թ. 44–օրյա պատերազմից հետո հարաբերություններն ավելի սրվեցին, երբ եկեղեցին պահանջեց Նիկոլ Փաշինյանի հրաժարականը։
Հիշեցնենք նաև` սեպտեմբերի 27-ին էլ տեղի է ունեցել Մայր տաճարի Նավակատիքը` դռնբացեքը, նաև օծվել են եկեղեցու սյուները, սեպտեմբերի 28-ին Մյուռոնօրհնեքն էր։ Այսօր վերաօծվեց Էջմիածնի Մայր տաճարը, որը 2018 թվականի վերջից մինչ օրս փակ էր այցելուների համար։