ԵՐԵՎԱՆ, 28 սեպտեմբերի – Sputnik. Իրանի Իսլամական հեղափոխության պահապանների կորպուսի (ԻՀՊԿ, Իրանի ԶՈւ էլիտար ստորաբաժանումներ) հրամանատարի օպերատիվ հարցերով տեղակալ, գեներալ-մայոր Աբբաս Նիլֆորուշանը զոհվել է նախօրեին Բեյրութին հասցված հարվածի հետևանքով: Այս մասին հայտնել է Mehr գործակալությունը՝ այլ մանրամասներ չներկայացնելով:
Ավելի վաղ Իսրայելի պաշտպանության բանակը, իսկ այնուհետև նաև «Հզբոլլահ» շարժման ներկայացուցիչները հաստատել էին «Հզբոլլահի» գլխավոր քարտուղար Հասան Նասրալլայի մահվան մասին տեղեկությունը: Նա սպանվել է սեպտեմբերի 27–ին Բեյրութի վրա իսրայելական օդուժի հարձակման հետևանքով։
Ավիահարվածը հասցվել է «Հզբոլլահի» ղեկավարության խորհրդակցության ժամանակ։ Ինչպես պնդում է Al Hadath հեռուստաալիքը, վկայակոչելով իսրայելական աղբյուրները, շիական կազմակերպության շտաբի վրա հարձակման ժամանակ հզոր ավիառումբեր են կիրառվել բունկերները խոցելու համար։ Նախնական տվյալներով՝ կան զոհեր և տասնյակ տուժածներ: