ԵՐԵՎԱՆ, 28 սեպտեմբերի – Sputnik. Ամուլսարի ոսկու հանքի գործարկման ժամկետները մնում են անփոփոխ. խոսքը 2025-ի առաջին կիսամյակի մասին է: Այս մասին հայտնեց ՀՀ տարածքային կառավարման և ենթակառուցվածքների նախարարի տեղակալ Հովհաննես Հարությունյանը Ծաղկաձորում Հայաստանի լեռնամետալուրգիական ձեռնարկությունների միության կողմից կազմակերպված «Mining Armenia» համաժողովում։
Նրա խոսքով՝ հանքավայրը կառավարող «Lydian» ընկերությունը լրացուցիչ պաշարների հետախուզում չի իրականացնում, այլ կենտրոնացած է նախկինում կառուցված ենթակառուցվածքի կրկնակի գնահատման վրա:
Հարությունյանը հավելեց, որ ժամկետների աննշան փոփոխություններ հնարավոր են աշխարհաքաղաքական իրավիճակի հետ կապված ֆինանսական գործոնների պատճառով: Սակայն, նույնիսկ այդ ռիսկերը հաշվի առնելով, կառավարությունը հայտարարված ժամկետներից էական շեղումներ չի ակնկալում։
Նա նաև նշեց, որ հանքի գործարկմամբ երկրում բավարար քանակությամբ ոսկու հանքաքար կլինի ոսկու շահավետ վերամշակման համար: Սակայն բանկային ձուլակտորների թողարկումն ավելի շատ քաղաքական հարց է, քանի որ խոսքը գնում է միջազգայնորեն ճանաչված վճարային միջոցի ստեղծման մասին։ Այս հարցերը, նրա խոսքով, արդիական կդառնան հանքի գործարկումից և պոտենցիալ գործընկերների հետ քննարկումներից հետո:
Հիշեցնենք, որ 2023-ի փետրվարին հուշագիր էր ստորագրվել «Lydian» ընկերության, ՀՀ կառավարության և Եվրասիական զարգացման բանկի միջև։ Ծրագրի շրջանակում նախատեսվում է ներգրավել 250 մլն դոլարի ներդրում, որից 100 մլն դոլարը կկազմի ԵԱԶԲ-ի վարկը: