ԵՐԵՎԱՆ, 27 սեպտեմբերի – Sputnik. Գրիգոր Մինասյանը Սահմանադրություն չի կարդացել, կուզեի, որ կարդար։ Այս մասին այսօր ԱԺ–ում լրագրողների հետ զրույցում ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը` անդրադառնալով արդարադատության նախախարի հայտարարությանը, թե փոխնախարար Սիրվարդ Գևորգյանի հրաժարականը մանր խարդավանքների հետևանք է։
«Ես կուզեի, որ Գրիգոր Մինասյանը Սահմանադրություն կարդա, նա փաստորեն Սահմանադրությունը չի կարդացել և չգիտի, որ պատգամավորները խժդժություններով չեն զբաղվում, նրանք Սահմանադրությամբ իրենց լիազրությունները իրացնում են»,–ասաց նա։
Քոչարյանն նշեց նաև, որ Գրիգոր Մինասյանը երեկ անթույլատրելի հայտարարություն է արել ու հավելեց, որ եթե Մինասյանը մնա նախարարի պաշտոնում, պետք է գա խորհրդարան ու բացատրություն տա։
Նա նաև հավելեց, որ ինքն էլ էր շատ ՔՊ–ականների նման դժգոհ արդարադատության փոխնախախար Սիրվարդ Գևորգյանի նշանակումից։
Հիշեցնենք, որ ՔՊ–ական որոշ պատգամավորներ ստորագրահավաք են սկսել արդարադատության նախարար Գրիգոր Մինասյանին պաշտոնանկ անելու համար ՀՀ վարչապետ Նիկոլ Փաշինյանին դիմում ներկայացնելու համար։
Մամուլում տարածվել էր տեղեկատվություն, թե դրա պատճառներից մեկն այն է, որ Գրիգոր Մինասյանը փոխնախարար է նշանակել Սիրվարդ Գևորգյանին, ով եղել ՀՀ երկրորդ նախագահ Ռոբերտ Քոչարյանի դստեր համակուրսեցին և նկար ունի, որտեղ նրա ձեռքում Քոչարյանի գիրքն է։
Երեկ հայտնի դարձավ, որ Արդարադատության նորանշանակ փոխնախարար Սիրվարդ Գևորգյանը հրաժարական է տվել։ Ինչից հետո նախարար Գրիգոր Մինասյանը իր ֆեյսբուքյան էջում գրել էր, որ առանձին անհատների չափազանց անարդար ու մանրախնդիր հարձակումների պատճառով նախարարությունը և պետական համակարգը կորցրեց իրապես արժեքավոր մասնագետի ու կառավարչի: