ԵՐԵՎԱՆ, 25 սեպտեմբերի - Sputnik. ՔՊ–ական որոշ պատգամավորներ, իսկապես ստորագրահավաք են սկսել արդարադատության նախարար Գրիգոր Մինասյանին պաշտոնանկ անելու համար ՀՀ վարչապետ Նիկոլ Փաշինյանին դիմում ներկայացնելու համար։ Այս մասին Sputnik Արմենիայի հետ զրույցում ասաց ՔՊ– ական պատգամավոր Հովիկ Աղազարյանը։
Նա հրաժարվեց ասել, թե որն է պատճառը, չասաց նաև` արդյոք ստորագրել է ինքն անձամբ, թե ոչ։
«Եթե պատգամավորները անհանգստություն ունեն,ուրեմն հիմնավոր պատճառ կա։ Ամեն ինչ պարզ կդառնա քննարկումների արդյունքում»,– ասաց նա։
Հարցին` դա կապ ունի՞ արդյոք արդարադատության նոր փոխնախարարի` Սիրվարդ Գևորգյանի նշանակման հետ,նա ասաց. « Իմ կարծիքով` այդ դրվագն ինքնին չի կարող դառնալ պատճառ»։
Նշենք, որ կուսակցության կանոնադրության համաձայն՝ ցանկացած պաշտոնյայի պաշտոնանկության հարցը քննարկման առարկա կարող է դառնալ, եթե 1/3-ը դիմում է ՔՊ ղեկավարին։ Այսինքն՝ 24 ստորագրություն հավաքելու դեպքում նախարարին հեռացնելու հարցը կքննարկվի, բայց վերջին խոսքը կլինի Փաշինյանինը. նա կորոշի՝ ինչ ընթացք տալ կուսակիցների դիմումին։
Հիշեցնենք` այսօր «Հրապարակ» թերթը գրել էր, որ նախորդ շաբաթ կուսակցական հավաքի ժամանակ գրեթե բոլոր կուսակցականները ելույթ են ունեցել ընդդեմ նախարարի` խայտառակություն համարելով այն, որ Սերժ Սարգսյանի փեսա Միքայել Մինասյանի հարազատ եղբորը նշանակել են բարձր պաշտոնի, իսկ նա էլ իր հերթին այլ նախկինների է նշանակում բարձր պաշտոնների։