ԵՐԵՎԱՆ, 19 սեպտեմբերի - Sputnik. Ռուսաստանի նախագահ Վլադիմիր Պուտինն ուսումնասիրել է անօդաչու թռչող սարքերի նմուշները Սանկտ Պետերբուրգի «Հատուկ տեխնոլոգիական կենտրոն» պաշտպանական ձեռնարկության հարթակում։ Այս մասին հաղորդում է ՌԻԱ Նովոստին:
Ռուսաստանի նախագահն այցելել է ցուցահանդես, որտեղ ներկայացված են ռոբոտատեխնիկական համալիրների նմուշները: Նրան ցույց են տվել թրթուրավոր հարթակները, կամիկաձե դրոնները, անօդաչու թռչող սարքով հետախուզական համալիրները, բարաժավորող զինամթերքի նմուշը։
Ավելի ուշ՝ հատուկ նշանակության անօդաչու ավիացիոն համակարգերի զարգացման ռազմարդյունաբերական հանձնաժողովի նիստի ժամանակ, Պուտինն ասել է, որ Ռուսաստանում անօդաչու համակարգերի շարքն ընդլայնվում է, ստեղծվում են առանց անձնակազմի մոտորանավեր, ինչպես նաև ռոբոտացված հարթակներ։
2023 թվականին ռուսական զորքերին մատակարարվել է տարբեր տեսակների 140 հազար անօդաչու թռչող սարք, 2024 թվականին այդ թիվը նախատեսվում է ավելացնել 10 անգամ։
«Անօդաչու թռչող սարքերի նախագծման, փորձարկման և սերիական թողարկման աշխատանքներն ընթանալու են հատուկ գիտարտադրական կենտրոնների հիմքի վրա։ Մինչև 2030 թվականը տարբեր շրջաններում նախատեսվում է 48 նման հարթակ ստեղծել»,-ասել է նա:
ՌԴ նախագահը շնորհակալություն է հայտնել ԱԹՍ-ների արտադրության ձեռնարկությունների ղեկավարներին և աշխատակիցներին որակյալ տեխնիկայի համար:
Նախօրեին երկրի ղեկավարը զինագործի օրվան ընդառաջ խորհրդակցություն էր անցկացրել հատուկ ռազմական գործողության պայմաններում զինված ուժերի զարգացման արդիական հարցերի շուրջ: