ԵՐԵՎԱՆ, 19 սեպտեմբերի – Sputnik․ Հայաստանում «Ինժեներական քաղաքի» կառուցման համար լրացուցիչ 1 մլրդ 945 մլն դրամ կհատկացվի։ Որոշումն ընդունվեց ՀՀ կառավարության այսօրվա նիստի ժամանակ։
ՀՀ բարձր տեխնոլոգիական արդյունաբերության նախարար Մխիթար Հայրապետյանի խոսքով` մայիսի 31–ին ավարտվել է Համաշխարհային բանկի ֆինանսավորումը, որից հետո խնդիր է առաջացել հետագա աշխատանքների ու սարքավորումների ձեռքբերման համար ֆինանսական միջոցներ հատկացնելու։
Նրա խոսքով` այդ հատկացումը կապահովի «Ինժեներեկան քաղաքի» կառուցման աշխատանքների անընդհատությունը։
Հատկացվող գումարը կտրամադրվի «Թվային փոխակերպման գործընթաց» ծրագրի չօգտագործված միջոցներից։ Դա կլինի պետբյուջեից վերցվող նախավերջին հատկացումը։
Մխիթարյանն ավելացրեց, որ 2025 թվականի տարեվերջին ևս 1 մլրդ դրամ հատկացում կլինի և այդպիսով պետբյուջեից հատկացումները կավարտվեն։ Մնացած հատկացումները կլինեն մասնավոր հատվածից։
Նշենք` Ինժեներական քաղաքում տեղակայված են ՏՏ և էլեկտրոնիկայի ոլորտի մի շարք ընկերություններ, կառուցվում են հետազոտական լաբորատորիաներ, իսկ վերջերս տեղադրվել է Ֆրանսիայից բերված գերհամակարգիչ։ Ինժեներական քաղաքը կառավարում է «Ձեռնարկությունների ինկուբատոր» հիմնադրամը` Համաշխարհային բանկի վարկային միջոցներով, ինչպես նաև ընկերությունների վարձավճարներով։