ՀՀ քննչական կոմիտեն երեկ հայտարարել էր տարածել իշխանությունը յուրացնելու նախապատրաստության համար 7 անձի նկատմամբ քրեական հետապնդում հարուցելու մասին։ Նրանցից 3–ը կալանավորվել են, 4-ի նկատմամբ հայտարարվել է հետախուզում։ Ըստ պաշտոնական հաղորդագրության` նրանք Դոնի Ռոստովում վճարովի եռամսյա հավաքներ են անցել:
«Փաստինֆո»,–ի տեղեկություններով` իշխանության յուրացման գործի թիրախում հերոսական ուղի անցած ազատամարտիկներն են. Կալանավորվածներից մեկը «Սև Հովազ» կամավորական ջոկատի նախագահ, արցախյան պատերազմների մասնակից Սերոբ Գասպարյանն է, ով այդ ջոկատի հրամանատարությունը ստանձնել է եղբոր՝ Ռուստամ Գասպարյանի և նրա որդու` 44-օրյա պատերազմում զոհվելուց հետո։
Քննչական կոմիտեի հաղորդագրությանը երեկ արձագանքել է «Արբատ» ռազմաբազայի հրամանատար Հայկ Գասպարյանը։ Ըստ քննչական կոմիտեի`իշխանազավթման համար կասկածվողները վերապատրաստվել են հենց Դոնի Ռոստովում գտնվող այս հայկական բազայում։ Ռազմաբազայի հրամանատարը հայտարարել էր, որ իրենց միավորման անդամները Ռուսաստաի քաղաքացիներ են ու չեն պատրաստվում միջամտել Հայաստանի քաղաքական կյանքին։ Իսկ Հայաստանի իշխանություններն այսօրինակ բացահայտումներով փորձում են հանրության ուշադրությունը շեղել իրենց քաղաքական ձախողումներից, նաև` Ռուսաստանին մեղադրել Ղարաբաղը հանձնելու մեջ։
Հատկանշական է, որ քրեական վարույթին վերաբերող հաղորդագրության մեջ շեշտվում է մասնակիցների` ԼՂ–ի և ՌԴ–ի քաղաքացիներ լինելու հանգամանքը։
ՀՀ քննչական կոմիտեի տարածքային քննչական վարչությունների գործունեության վերահսկողության գլխավոր վարչության նախկին պետ, արդարադատության գեներալ-մայոր Թաթուլ Պետրոսյանն այս հարցում դիտավորություն է նկատում։
«Նպատակն է կրկին անգամ «հայաստանցի–արցախցի» ձևակերպմամբ սեպ խրել մեր հայկական երկու տարածքների բնակիչների միջև։ Շարունակաբար ատելություն են սերմանում, որպեսզի շագանակներ քաղեն` բաժանիր, որ տիրես սկզբունքով»,– ասում է Պետրոսյանը։